Rossiya Balakleya ishg‘ol etilganini e’lon qildi

Ukrainaga hujum boshlagan Rossiya Federatsiyasi armiyasi Chistopole, Novopoltavka, Jovtneveni egallagani va front chizig‘ini tan olinmagan rossiyaparast Donetsk xalq respublikasi bo‘linmalari bilan tenglashtirdi. Balakleya shahri ham ukrainlardan tortib olingan.Bu haqda bugun, 3 mart kuni Rossiya Mudofaa vazirligi matbuot kotibi Igor Konashenkov ma’lum qildi.

“Rossiya armiyasi Ukraina tinch aholisi xavfsizligini ta’minlash choralarini ko‘rmoqda”, degan u.

Konashenkovning qo‘shimcha qilishicha, DXR kuchlari Mariupol shahri qurshovini toraytirib, qator aholi punktlarini nazoratga olgan. 

“DXR qurolli kuchlari bo‘linmalari Mariupol shahri qurshovini toraytirdi, shuningdek, Vinogradnoye, Sartana va Vodyanoye aholi punktlarini nazorat ostiga oldi”, degan u.

Konashenkovning qo‘shimcha qilishicha, LXR qo‘shinlari bir sutkada 4 km ilgarilab, Severodonetsk shimoliy chekkasiga yetib borgan. 

“LXR qo‘shinlari guruhi Rossiya qurolli kuchlarining ko‘magida hujum operatsiyalarini davom ettirdi va Krasniy Liman - Privole chizig‘i - Severodonetsk shimoliy chekkasiga yetib keldi”, degan Konashenkov.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH va Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.