Putinga yon berish falokatga olib keladi – Jonson

Buyuk Britaniya Bosh vaziri Boris Jonson og‘ishmasdan Ukrainani qo‘llab-quvvatlashda davom etishga va’da berdi. Bu haqda “The Independent” nashri hukumat rahbarining rasmiy vakiliga asoslanib xabar berdi.

Britaniya hukumati rahbarining ta’kidlashicha, Moskvadagi hamkorlarga har qanday yon berish fojiaga olib keladi.

“Biz hech kimning Putinga yon berish fojiadan boshqa narsaga olib kelishiga ishonishiga yo‘l qo‘ymasligimiz kerak”, degan Jonson.

Bosh vazirning fikricha, Rossiya va uning ittifoqchilari yon berishni Ukrainaga qarshi asossiz tajovuz uchun mukofot sifatida qabul qilishlari mumkin. Bu Buyuk Britaniya xavfsizligi va iqtisodiyotiga ta’sir qilishiga Jonsonning ishonchi komil.

Jonson, shuningdek, xalqaro hamjamiyatning Ukrainaga yangi siyosiy, harbiy va moliyaviy yordamini ta’minlashga va’da berdi.

Eslatib o‘tamiz, bundan oldin Boris Jonson Ukrainaning Rossiya Federatsiyasi agressiyasidan o‘zini himoya qilish qobiliyatini kuchaytirish uchun to‘rtta qadamni sanagandi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.