Pompeo Ozarbayjon va Armaniston TIV rahbarlari bilan uchrashdi

Bugun, 23 oktyabr kuni AQSH Davlat kotibi Maykl Pompeo Vashingtonda Ozarbayjon Tashqi ishlar vaziri Jayxun Bayramov va Armaniston TIV rahbari Zograb Mnatsakanyan bilan alohida-alohida uchrashdi. Ammo har ikki vazir bilan bir mavzu Tog‘ri Qorabog‘dagi vaziyat muhokama qilindi.

“23 oktyabrda Ozarbayjon Tashqi ishlar vaziri Jayxun Bayramov AQSHga tashrifi davomida Maykl Pompeo bilan uchrashdi. Unda Tog‘li Qorabog‘dagi vaziyat muhokama qilindi. Ozarbayjon vaziri Amerikani Armanistonning buzg‘unchi siyosati, tinch aholining o‘qqa tutilayotgani, xorijiy yollanma askarlar va terrorchilar jalb qilinayotganidan ogohlantirdi”, deyiladi Ozarbayjon TIV xabarida.

Bayramov Ozarbayjonning pozitsiyasi BMT Xavfsizlik Kengashining to‘rtta rezolyutsiyasi va boshqa xalqaro tashkilotlarning shu kabi hujjatlariga mosligini alohida urg‘ulagan.

Pompeo va Mnatsakanyan uchrashuvida Tog‘li Qorabog‘ mojarosini tinch yo‘l bilan hal qilish bo‘yicha YeXHTning Minsk guruhi doirasida muzokarlarni davom ettirish muhimligi ta’kidlangan. Bu haqda Armaniston TIV xabar bergan.

“Mnatsakanyan va Pompeo Qorabog‘ mojarosi hududida zudlik bilan o‘t ochishni to‘xtatish bo‘yicha erishilgan kelishuvga amal qilish, YeXHTning Minsk guruhi doirasida tinch muzokaralar jarayonini davom ettirish zarurligini tasdiqladi”, deyiladi arman tomoni xabarida.

Avvalroq, Ozarbayjon Prezidenti Ilhom Aliyev mamlakat Qurolli kuchlari Qorabog‘ janubida Eron bilan chegaradosh hududlarni to‘liq nazoratga olganini ma’lum qilgandi.

Eslatib o‘tamiz, Ozarbayjon va Armaniston Rossiya vositachiligida sulhga erishdi. Ammo bu sulhning umri bir necha soat davom etdi. Keyinroq, tomonlar yana o‘t ochishni to‘xtatishga qaror qildi. Bu safar ham bu rejim uzoqqa bormadi.

Rasmiy Bakuga ko‘ra, Armaniston Qurolli Kuchlari joriy yilning 27 sentyabr kuni soat 06:00 dan boshlab Ozarbayjonga qarshi keng ko‘lamli provokatsiyalarni amalga oshirdi, butun front bo‘ylab Ozarbayjon armiyasining pozitsiyalarini, shuningdek, oldingi chiziq zonasida joylashgan aholi punktlarini o‘qqa tutdi.

Armaniston hujum Ozarbayjon qurolli kuchlari tomonidan boshlanganini aytmoqda. Ozarbayjon esa qurolli to‘qnashuvga nisbatan javob hujumlari boshlaganini rasman e’lon qilib, Armaniston chegarasidagi tinch aholi vakillarini chegara hududlaridan chetga chiqishlarini so‘radi.

Holat bo‘yicha Ozarbayjon Respublikasi Prezidenti Ilhom Aliyev xalqqa murojaat bilan chiqib, to‘qnashuv Ozarbayjonning provokatsiyasi emasligini aytdi.

Nikol Pashinyan esa mamlakatda harbiy holat va umumiy safarbarlik e’lon qildi.  Buning ortidan Ilhom Aliyev mamlakatda harbiy holat va komendantlik soati e’lon qilish haqidagi farmonga imzo chekdi. Shuningdek, Aliyev 28 sentyabr kuni qisman safarbarlik e’lon qilish haqidagi hujjatni imzoladi. 

Ozarbayjon va Armaniston o‘rtasida keskinlik avj olgandan keyin Tashqi ishlar vaziri Sergey Lavrov ikki mamlakat Tashqi ishlar vazirlari bilan telefon orqali muloqot qilib, ularni muzokaralar stoliga qaytishga chaqirgan edi. Prezident Vladimir Putin esa Nikol Pashinyan bilan muloqot qilib, masalani tinch yo‘l bilan hal etishni tavsiya qildi. Bu orada Ozarbayjon Prezidenti Ilhom Aliyev asosiy kuch va dastakni Turkiya Respublikasidan olayotgani ma’lum bo‘ldi. Shu kuni Turkiya va Ozarbayjon Prezidentlari telefon orqali muloqot qildilar va Erdo‘g‘an turk xalqi va davlati Ozarbayjonni bor imkoniyati bilan qo‘llab-quvvatlashini eslatdi. 

Ozarbayjon va Armaniston o‘rtasidagi Tog‘li Qorabog‘ mojaroli zonasidagi vaziyat ko‘p jihatdan Rossiyaga bog‘liq. Rossiya Birlashgan Millatlar Tashkiloti Xavfsizlik Kengashining doimiy a’zosi, shuningdek Yevropada xavfsizlik va hamkorlik tashkiloti Minsk guruhining hamraisi. 1 oktyabr kuni guruh hamraislari – AQSH, Rossiya va Fransiya Tog‘li Qorabog‘ masalasida qo‘shma bayonot e’lon qildilar.