Баку ва Ереван бир-бирини ўт очишни тўхтатиш режимини бузишда айблади

Олам 4993

Арманистон ва Озарбайжон Мудофаа вазирликлари бир-бирини Тоғли Қорабоғдаги сулҳни бузишда айблади.

“Озарбайжон бўлинмалари 10 октябрь куни соат 12:00 да эълон қилинган инсонпарварлик сулҳини менсимасдан, соат 12:05 да Қорахамбейли қисмига ҳужум уюштиришди. Арцах мудофаа армиясининг (тан олинмаган Тоғли қорабоғ республикаси Қуролли кучлари) бўлинмалари душман ҳужумини бостириш учун тегишли чораларни кўрмоқда”, дейилади Арманистон мудофаа вазирлиги матбуот котиби Шушан Степаняннинг ижтимоий тармоқдаги саҳифасида.

Ўз навбатида Озарбайжон мудофаа вазирлиги Арманистон ҳарбийлари Тертер ва Агдам шаҳарларини ўққа тутганини маълум қилди. Шунингдек, ўқ отишни тўхтатиш режимини бузган арман зирҳли техникаларининг йўқ қилиниши акс этган видеони ҳам эълон қилди.

Расмий Баку Ереванни сулҳни қўпол равишда бузишда айблади. Арманистон томони буни рад қиляпти.

Эслатиб ўтамиз, Озарбайжон ва Арманистон Россия воситачилигида Тоғли Қорабоғда ўт очишни тўхтатишга келишди. Сулҳ асирлар ва жасадларни алмашиш мақсадида тузилди.

Расмий Бакуга кўра, Арманистон Қуролли Кучлари жорий йилнинг 27 сентябрь куни соат 06:00 дан бошлаб Озарбайжонга қарши кенг кўламли провокацияларни амалга оширди, бутун фронт бўйлаб Озарбайжон армиясининг позицияларини, шунингдек, олдинги чизиқ зонасида жойлашган аҳоли пунктларини ўққа тутди.

Арманистон ҳужум Озарбайжон қуролли кучлари томонидан бошланганини айтмоқда. Озарбайжон эса қуролли тўқнашувга нисбатан жавоб ҳужумлари бошлаганини расман эълон қилиб, Арманистон чегарасидаги тинч аҳоли вакилларини чегара ҳудудларидан четга чиқишларини сўради.

Ҳолат бўйича Озарбайжон Республикаси Президенти Илҳом Алиев халққа мурожаат билан чиқиб, тўқнашув Озарбайжоннинг провокацияси эмаслигини айтди.

Никол Пашинян эса мамлакатда ҳарбий ҳолат ва умумий сафарбарлик эълон қилди.  Бунинг ортидан Илҳом Алиев мамлакатда ҳарбий ҳолат ва комендантлик соати эълон қилиш ҳақидаги фармонга имзо чекди. Шунингдек, Алиев 28 сентябрь куни қисман сафарбарлик эълон қилиш ҳақидаги ҳужжатни имзолади

Озарбайжон ва Арманистон ўртасида кескинлик авж олгандан кейин Ташқи ишлар вазири Сергей Лавров икки мамлакат Ташқи ишлар вазирлари билан телефон орқали мулоқот қилиб, уларни музокаралар столига қайтишга чақирган эди. Президент Владимир Путин эса Никол Пашинян билан мулоқот қилиб, масалани тинч йўл билан ҳал этишни тавсия қилди. Бу орада Озарбайжон Президенти Илҳом Алиев асосий куч ва дастакни Туркия Республикасидан олаётгани маълум бўлди. Шу куни Туркия ва Озарбайжон Президентлари телефон орқали мулоқот қилдилар ва Эрдўған турк халқи ва давлати Озарбайжонни бор имконияти билан қўллаб-қувватлашини эслатди

Озарбайжон ва Арманистон ўртасидаги Тоғли Қорабоғ можароли зонасидаги вазият кўп жиҳатдан Россияга боғлиқ. Россия Бирлашган Миллатлар Ташкилоти Хавфсизлик Кенгашининг доимий аъзоси, шунингдек Европада хавфсизлик ва ҳамкорлик ташкилоти Минск гуруҳининг ҳамраиси. 1 октябрь куни гуруҳ ҳамраислари – АҚШ, Россия ва Франция Тоғли Қорабоғ масаласида қўшма баёнот эълон қилдилар

Суннатилла Абдуллаев
Мақолага баҳо беринг
Баҳолаганлар: 47
Рейтинг: 3
t
×