Niderlandiyada ruslarning necha millionlik boyligi bandi qilingani ochiqlandi

Olam 4436
image

Niderlandiyadagi moliya institutlari hozirgacha Rossiyaning 632 million yevro miqdoridagi aktivlarini muzlatib qo‘ygan. Bu haqda Niderlandiya Tashqi ishlar vaziri Vopke Xukstraning bugun, 22 aprel kuni milliy parlamentga yuborgan hisobotida aytildi.

Unga ko‘ra, mamlakat jami “632 million yevroni muzlatib qo‘ygan va 274 million yevrolik operatsiyalarni bloklagan”. Bundan tashqari, 20 ta yaxta bilan bog‘liq vaziyat alohida nazoratga olingan. Rossiya Federatsiyasiga kiritilgan sanksiyalar tufayli kemalar Niderlandiyadan chiqib keta olmaydi, yetkazib berilmaydi yoki egalariga topshirilmaydi. Bojxona organlari tomonidan 33,5 ming dona konteyner tekshirilib, 63 ming dona tovarlarni eksport qilish deklaratsiyasi ko‘rib chiqilgan.

Hujjatda vazir sanksiyaga uchragan rossiyaliklar Niderlandiyadagi cheklovlardan qochayotgani haqidagi ayblovlarni rad etdi. 

“Surishtiruv va tekshirishlar sanksiyalangan shaxslarning sezilarli darajada muzlatilmagan aktivlari yo‘qligini ko‘rsatmoqda”, degan Xukstra.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.

Sunnatilla Abdullayev
Maqolaga baho bering
Baholaganlar: 6
Reyting: 3.3
t
×