Maxsus xizmatlar Baydenga Rossiyaga “hujum” uyushtirishni taklif qildi

AQSH razvedka xizmatlari Prezident Jo Baydenga “Rossiyaga qarshi hujum uyushtirish, jumladan, Rossiyaning Ukrainadagi harbiy amaliyotlarini davom ettirish qobiliyatiga putur yetkazish uchun Rossiyada internet aloqasini uzish, elektr energiyasini uzish va temir yo‘llarni beqarorlashtirish” variantlarini taklif qilmoqda. Bu haqda NBC telekanali xabar bermoqda.

AQSH razvedkasining ikki xodimi, bir G‘arb razvedkasi va bu borada ma’lumot bergan boshqa bir xodim hali yakuniy qarorlar qabul qilinmaganini, biroq Baydenga taklif qilingan variantlar yetarli ekanligini aytishgan.

“Siz, masalan, poyezdlarni sekinlashtirishdan tortib, ularni relsdan chiqarishgacha bo‘lgan hamma narsani qilishingiz mumkin”, degan manba.

Shuningdek, Amerika razvedka idoralari Rossiya resurslariga “keng miqyosli kiberhujum” variantini alohida ko‘rib chiqmoqda.

“Ko‘rib chiqilayotgan potensial kiberhujumlarning aksariyati halokatga emas, buzishga qaratilgan va shuning uchun Qo‘shma Shtatlarning Rossiyaga qarshi urush harakati deb baholanmaydi. G‘oya odamlarga emas, tarmoqlarga zarar yetkazishdir”, dedi manba.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Buning ortidan Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirdi. Ko‘p o‘tmay Prezident Rossiya bilan diplomatik aloqani uzdi.

Rus qo‘shinlari dastlab Kiyev va Xarkovga raketa hujumi uyushtirdi. Prezident Zelenskiy mamlakatda harbiy holat e’lon qildi. Shuningdek, rasmiy idora rus qo‘shinlari Xarkov va Odessa viloyatiga kirib borganini bildirdi.

Hujum boshlanganidan ko‘p o‘tmay, LXR Ichki ishlar vaziri maslahatchisi Vitaliy Kiselev Schaste va Stanitsa shaharchalari LXR nazoratiga o‘tganini e’lon qildi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.