Lukashenko Putin va Zelenskiy muzokaralarini o‘tkazish uchun Mustaqillik saroyini berishni taklif qildi

Minsk Ukrainadagi mojaroni hal qilish uchun platforma taqdim etishga va tinchlik muzokaralari o‘tkazilishini ta’minlashga tayyor. Bu haqda Belarus fuqarosi Aleksandr Lukashenko ma’lum qildi. 

“Bugun kelishsin. Urushni oldini olishni ta’minlaymiz va yordam beramiz”, deydi Lukashenko. 

Uning so‘zlariga ko‘ra, ushbu mavzuni u Rossiya Prezidenti Vladimir Putin bilan muhokama qilgan. 

“Kiyev haqiqatan ham qurshab olingan, ular bo‘lsa bekorchi narsalarni gapirishmoqda. Odamlar o‘lmoqda, ular bo‘lsa hamon g‘iybat bilan ovvoralar. Lekin siz kecha Rossiya Prezidentining urush borasidagi pozitsiyasini eshitdingiz. U men bilan ushbu mavzuda gaplashgan. Men unga muzokara uchun qayerda bo‘lmasin, eshiklar ochiqligini aytdim, kerak bo‘lsa Mustaqillik saroyida ham. To‘liq xavfsizlikni ta’minlaymiz, keling”, deydi Aleksandr Lukashenko. 

Uning ta’kidlashicha, ertaga Rossiya hamda Ukraina rahbarlari muzokara uchun Minskka kelishlari kerak.

Avvalroq, Aleksandr Lukashenko Ukraina sharqida rossiyaparast separatistlar tomonidan tashkil etilgan Lugansk xalq respublikasi va Donetsk xalq respublikasi suverenitetini tan olish masalasi Belarus rasmiylarining kun tartibida turganini ma’lum qilgandi.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Buning ortidan Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirdi. Ko‘p o‘tmay Prezident Rossiya bilan diplomatik aloqani uzdi.

Rus qo‘shinlari dastlab Kiyev va Xarkovga raketa hujumi uyushtirdi. Prezident Zelenskiy mamlakatda harbiy holat e’lon qildi. Shuningdek, rasmiy idora rus qo‘shinlari Xarkov va Odessa viloyatiga kirib borganini bildirdi.

Hujum boshlanganidan ko‘p o‘tmay, LXR Ichki ishlar vaziri maslahatchisi Vitaliy Kiselev Schaste va Stanitsa shaharchalari LXR nazoratiga o‘tganini e’lon qildi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.