Lavrov Ukrainadagi mojaroning cho‘zilishi sababini aytdi

Olam

image

G‘arb Ukrainaga qancha uzoq qurol yetkazib bersa, Ukrainadagi mojaro shunchalik uzoq davom etadi. Bu haqda Rossiya Tashqi ishlar vaziri Sergey Lavrov Kaspiy dengiz bo‘yi davlatlari Tashqi ishlar vazirlari uchrashuvi yakunlari bo‘yicha bo‘lib o‘tgan matbuot anjumanida ma’lum qildi.

“G‘arb qabul qilgan bunday yo‘nalish mutlaqo teskari va zararli. Ular Ukrainaga qancha ko‘p qurol yetkazib bersa, bu mojaro shunchalik uzoq davom etadi, G‘arb poytaxtlari tomonidan qo‘llab-quvvatlanayotgan natsistlar rejimining azobi shunchalik uzoq davom etadi”, deydi Lavrov.

Avvalroq, Rossiya Prezidenti matbuot kotibi Dmitriy Peskov ham Kiyev harbiylariga qurol tashlashni buyursa, Ukrainadagi jangovar harakatlar “kun oxirigacha” tugashi mumkinligini aytgani haqida xabar bergan edik. 

Ma’lumot uchun, NATO Bosh kotibi Yens Stoltenberg Kiyevga zamonaviy qurol-yarog‘larning yetkazib berilishi Ukrainaning Donbass ustidan nazoratni qayta tiklash imkoniyatini oshirishi mumkinligini bildirgan.

Shuningdek, Buyuk Britaniya Bosh vaziri Boris Jonson urush uzoq davom etishiga qaramay, G‘arb Kiyevni qo‘llab-quvvatlashdan to‘xtamasligini aytgan.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.


Maqola muallifi

Teglar

Lavrov Rossiya-Ukraina urushi Ukrainaga bosqin

Baholaganlar

33

Reyting

3

Maqolaga baho bering

Doʻstlaringiz bilan ulashing