Lavrov Putin Zelenskiy bilan qachon uchrashishini aytdi

Rossiya Tashqi ishlar vaziri Sergey Lavrov ukrainalik hamkasbi Dmitriy Kuleba bilan uchrashuvda Prezidentlar Vladimir Putin va Vladimir Zelenskiy o‘rtasidagi uchrashuv ehtimolini muhokama qilganini, biroq bunday aloqa “uchrashuv maqsadidagi uchrashuv” bo‘lmasligi kerakligini aytdi.  

“Prezident Putin hech qachon aloqalarni rad etmasligini hamma yaxshi biladi. Biz bu muloqotlar faqat o‘z manfaati uchun emas, balki qandaydir aniq kelishuvlarni tuzish uchun tashkil etilishini istaymiz”, degan Lavrov. 

U bu mavzuga to‘xtalib o‘tilganini ta’kidlagan. 

“Men unga (Kuleba) eslatdim, agar biz qo‘shimcha qiymatga erisha olsak va muammoni hal qila olsak, har doim uchrashish tarafdorimiz. Bugun biz Prezident Putin Prezident Zelenskiy bilan uchrashishdan bosh tortmasligini tasdiqladik. Ehtimol, qachondir shunday ehtiyoj tug‘iladi degan umiddaman. Ukraina tomoni takliflarni qabul qildi va bizga juda aniq javoblar bo‘lishini vada qildi. Biz kutamiz”, degan Lavrov.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.