KXSHT kuchlari Qozog‘istondan qachon chiqadi?

Olam 8243
image

KXSHT kuchlari Qozog‘istonni mamlakatdagi vaziyat barqarorlashganidan keyin tark etadi. Bu haqda mamlakat Tashqi ishlar vazirligi bayonotida so‘z boradi.

“KXSHT tinchlikparvar kuchlari Qozog‘istonda vaqtincha bo‘ladi va mamlakatning birinchi murojaati bilan vaziyat barqarorlashganidan so‘ng mamlakatni tark etadi”, deyiladi  bayonotda.

Shu o‘rinda Davlat kotibi Yerlan Karinga ko‘ra, Qozog‘istondagi  aksilterror operatsiyasida faqat mahalliy maxsus kuchlar “Aristan”, “Arlan”, “Berkut”, shuningdek, Mudofaa vazirligi qo‘shinlari ishtirok etmoqda.

"Aksilterror operatsiyasida faqatgina Qozog‘istonning "Aristan", "Arlan", "Berkut" maxsus bo‘linmalari, shuningdek, Mudofaa vazirligining terrorchilik guruhlari va bandit tuzilmalaridan tozalovchi kuchlari ishtirok etadi. KXSHT tinchlikparvar kontingentini jalb qilish birinchi navbatda Qozog‘iston suvereniteti va yaxlitligini mustahkamlashga qaratilgan”, deb yozadi Karin o‘zining Telegram kanalida.

Qozog‘istonda namoyishlar 

Qozog‘istonda norozilik aksiyalari yangi yilning ilk kunlaridan boshlandi. Janaozen shahrida avtomobil egalari suyultirilgan gaz narxi 120 tengega (qariyb 3 ming so‘m) ko‘tarilganidan norozi bo‘lib, ommaviy mitingga chiqdi. Tobora olovlangan namoyishlar ortidan Hukumat komissiyasi Aqtau shahridagi “Intimak” maydonida namoyishchilar bilan uchrashgan. Uchrashuv davomida suyultirilgan gaz narxini pasaytirish va Mang‘istau viloyatida gaz narxini litri uchun 50 tenge etib belgilash to‘g‘risida qaror qabul qilingan.    

Muzokara davomida tomonlar barcha yuzaga kelayotgan muammolarni konstruktiv muloqotning asosiy oqimida va amaldagi qonunchilik doirasida hal qilishga kelishib olgan.    

5 yanvar kuni, Qozog‘istonning amaldagi Hukumati iste’fo berdi. Prezident Qosim-Jomart To‘qayev Hukumat iste’fosini qabul qildi. Shuningdek, Qozog‘istonning Birinchi Prezidenti - Elboshi Nursulton Nazarboyev Qozog‘iston Xavfsizlik kengashi raisi lavozimidan ketdi. Uning o‘rnini Prezident To‘qayev egalladi.

Milliy xavfsizlik qo‘mitasi raisi Karim Masimov lavozimidan ozod etildi. Uning o‘rnini Yermek Sagimbayev egalladi.

Qozog‘istonda butun mamlakat bo‘ylab 19 yanvargacha favqulodda holat joriy etildi. Shuningdek, shu kunlarda soat 23:00 dan 07:00 gacha komendantlik soati amalda bo‘ladi.

Prezident Respublika Saken Isabekovni davlat qo‘riqlash xizmati rahbari etib tayinlash to‘g‘risidagi farmonni imzoladi.

To‘qayev mamlakatdagi norozilik vaziyatiga Hukumat, xususan, Energetika vazirligi, shuningdek, “Kazmunaygaz” va “Kazakgaz” kompaniyalarini aybladi.

Kollektiv xavfsizlik shartnomasi tashkiloti (ODKB) mamlakatga cheklangan muddatga tinchlikparvar kuchlarni kiritish to‘g‘risida qaror qabul qildi

Diyora Abdurahmonova
Maqolaga baho bering
Baholaganlar: 113
Reyting: 3.1
Teglar
t
×