Qozog‘iston chegarachilari O‘zbekiston fuqarosini qo‘lga oldi

Qozog‘iston Milliy xavfsizlik qo‘mitasi chegara xizmati xodimlari respublika janubida tartibsizliklarda ishtirok etgan, deb taxmin qilingan O‘zbekiston fuqarosini qo‘lga oldi. Bu haqda MXQ matbuot xizmati xabar berdi.

“Jibek yo‘li” (Turkiston viloyati) nazorat-o‘tkazish punktida 1993 yilda tug‘ilgan O‘zbekiston Respublikasi fuqarosi O‘zbekistonga ketmoqchi bo‘lgan vaqtida qo‘lga olindi”, deyiladi xabarda.

Qayd etilishicha, o‘zbekistonlik o‘qdan jarohatlangan bo‘lgan. Taxminlarga ko‘ra, rezina o‘qdan.

Qo‘mita ma’lumotlariga ko‘ra, qo‘lga olingan shaxsning mobil telefonida Qozog‘istonning Chimkent shahridagi tartibsizliklar sodir bo‘lgan joyda olingan videotasvirlar bo‘lgan.

Avvalroq Olma-ota politsiya boshqarmasi jinoiy javobgarlikka tortilmasligi uchun fuqarolarni noqonuniy saqlanayotgan qurollarni topshirishga chaqirgan edi.

Qozog‘istonda namoyishlar

Qozog‘istonda norozilik aksiyalari yangi yilning ilk kunlaridan boshlandi. Janaozen shahrida avtomobil egalari suyultirilgan gaz narxi 120 tengega (qariyb 3 ming so‘m) ko‘tarilganidan norozi bo‘lib, ommaviy mitingga chiqdi. Tobora olovlangan namoyishlar ortidan Hukumat komissiyasi Aqtau shahridagi “Intimak” maydonida namoyishchilar bilan uchrashgan. Uchrashuv davomida suyultirilgan gaz narxini pasaytirish va Mang‘istau viloyatida gaz narxini litri uchun 50 tenge etib belgilash to‘g‘risida qaror qabul qilingan.

Muzokara davomida tomonlar barcha yuzaga kelayotgan muammolarni konstruktiv muloqotning asosiy oqimida va amaldagi qonunchilik doirasida hal qilishga kelishib olgan.    

Shuningdek, miting ishtirokchilari javobgarlikka tortilmasligiga ham kafolat berilgandi. Lekin, 5 yanvar kuni Qozog‘iston huquq-tartibot idoralari mamlakatning bir qancha viloyatlarida sodir etilgan noqonuniy harakatlar chog‘ida jamoat tartibini buzganlik uchun 200 dan ortiq kishini qo‘lga oldi.

Shuningdek, Milliy xavfsizlik qo‘mitasi raisi Karim Masimov lavozimidan ozod etildi. Uning o‘rnini Yermek Sagimbayev egalladi.

Qozog‘istonda butun mamlakat bo‘ylab 19 yanvargacha favqulodda holat joriy etildi. Shuningdek, shu kunlarda soat 23:00 dan 07:00 gacha komendantlik soati amalda bo‘ladi.

Prezident Respublika Saken Isabekovni davlat qo‘riqlash xizmati rahbari etib tayinlash to‘g‘risidagi farmonni imzoladi.

To‘qayev mamlakatdagi norozilik vaziyatiga Hukumat, xususan, Energetika vazirligi, shuningdek, “Kazmunaygaz” va “Kazakgaz” kompaniyalarini aybladi.

Kollektiv xavfsizlik shartnomasi tashkiloti (ODKB) mamlakatga cheklangan muddatga tinchlikparvar kuchlarni kiritish to‘g‘risida qaror qabul qildi. 6 yanvar kuni Rossiya, Belarus, Armaniston va Qirg‘iziston harbiylaridan iborat KXSHT tinchlikparvar kontingenti Qozog‘istonga kirdi. Xorijiy harbiylarga muhim ahamiyatga ega ob’ektlarni qo‘riqlash vazifasi topshirildi. KXSHT kontingenti kecha Qozog‘istonni tark etishni boshladi. Hozirgacha Belarus, Armaniston va Rossiya harbiylari ortga qaytgani haqida xabar berildi.