G7 davlatlari Rossiya oltiniga embargo qo‘ydi 

Olam 9272
image

"Katta yettilik" (G7) mamlakatlari Rossiya oltini importiga taqiq qo‘ydi. Bu haqda AQSH Prezidenti Jo Bayden ma’lum qildi.

“Katta yettilik davlatlari birgalikda Rossiyaga o‘nlab milliard dollar olib keladigan eng muhim eksport bo‘lgan oltinining importini taqiqlashini e’lon qiladi”, deydi Bayden. 

Amerika rahbari, shuningdek Vashington Ukrainadagi mojaro tufayli “Rossiyani misli ko‘rilmagan xarajatlarni o‘z zimmasiga olishga majbur qilgan”ini ham aytib o‘tgan.

Ma’lumot o‘rnida, “Katta yettilik” – Buyuk Britaniya, Germaniya, Italiya, Kanada, AQSH, Fransiya va Yaponiyani o‘z ichiga olgan iqtisodiy rivojlangan mamlakatlar uyushmasi.

Aytish joizki, oltin Rossiya Markaziy bankining asosiy aktivlaridan biridir. Ukrainadagi urush boshlanganidan so‘ng Markaziy bankning 300 milliard dollarga yaqin oltin-valyuta aktivlari G‘arb sanksiyalariga muvofiq muzlatib qo‘yilgan. Markaziy bank zaxiralarining qariyb yarmi oltinda saqlanadi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.

Diyora Abdurahmonova
Maqolaga baho bering
Baholaganlar: 19
Reyting: 3
t
×