Erdo‘g‘an Putinni rus-ukrain muzokaralariga mezbonlik qilishga ko‘ndirdi

Rossiya va Turkiya Prezidentlari Vladimir Putin va Rajab Toyib Erdo‘g‘an kecha, 27 mart kuni bo‘lib o‘tgan telefon orqali suhbat chog‘ida Rossiya va Ukraina delegatsiyalari o‘rtasidagi muzokaralarning navbatdagi raundi Istanbulda o‘tkazilishiga kelishib oldi.

“Muzokaralar chog‘ida Rossiya-Ukraina urushidagi so‘nggi vaziyat va muzokaralar jarayoni muhokama qilindi. Prezident Erdo‘g‘an va Prezidenti Putin Rossiya va Ukraina muzokaralar delegatsiyalarining navbatdagi uchrashuvini Istanbulda o‘tkazishga kelishib oldilar”, deyiladi Turkiya Prezidenti devoni xabarida.

Erdo‘g‘an, shuningdek, Anqara Rossiya va Ukraina o‘rtasidagi tinchlikni mustahkamlashda davom etishini aytgan. 

“Prezident Erdo‘g‘an imkon qadar tezroq Rossiya va Ukraina o‘rtasida sulh va tinchlik o‘rnatish, shuningdek, mintaqadagi gumanitar vaziyatni yaxshilash zarurligini ta’kidladi. Turkiya bu jarayonga o‘z hissasini qo‘shishda davom etishini qo‘shimcha qildi”, deyiladi xabarda.

Avvalroq Ukraina va Rossiya bilan muloqotni davom ettirayotgan Turkiya Prezidenti Rajab Toyib Erdo‘g‘an Moskvaning 6 ta talabidan 2 tasini qabul qilib bo‘lmas, deya baholagani haqida xabar bergan edik.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.