Britaniya rossiyaliklarga qarshi yangi sanksiyalarni e’lon qilishi kutilmoqda 

Buyuk Britaniya Tashqi ishlar vaziri Liz Trass bugun, 30 mart kuni rossiyalik ishbilarmonlarga qarshi yangi sanksiyalarni e’lon qiladi. 

“Tashqi ishlar vaziri Liz Trass bugun (30 mart) sanksiyaga uchragan rossiyalik oligarxlar va ularning bizneslariga oid qo‘shimcha qonun hujjatlarini qabul qiladi. Qonun nizomi parlamentga soat 17:00 da (Toshkent vaqti bilan 22:00) kiritiladi”, deyiladi xabarda. 

Ta’kidlanishicha, Qrim bo‘yicha sanksiyalar parlamentga taqdim etilgan yangi qonun hujjatlari doirasida Donetsk va Lugansk viloyatlarining Ukraina hukumati nazorati ostida bo‘lmagan hududlariga qo‘llaniladi. Yangi cheklovlar Rossiya Federatsiyasi tadbirkorlarining shaxsiy samolyotlari va yaxtalarini texnik ko‘rikdan o‘tkazishga ham ta’sir qiladi. 

Eslatib o‘tamiz, joriy yilning 24 mart kuni Buyuk Britaniya hukumati Rossiyaning bir qancha banklari, kompaniyalari va mudofaa sektori korxonalarini “qora ro‘yxat”ga kiritgandi. 

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.