Bosh qo‘mondondek ish tutdim – Bayden Rossiyaga qarshi qarorlari bilan maqtandi

Olam

image
0:00
0:00
download

AQSH Prezidenti Jo Bayden Vashingtonning Rossiyaga qarshi sanksiyalari uning mamlakati uchun eng yaxshi tanlov ekanini aytdi.

“Bu (sanksiyalar) mamlakat uchun eng yaxshisi. Hazil emas. (...) Agar NATOdagi eng muhim kuch, biz birlashtirgan tashkiliy tuzilma Rossiya agressiyasidan chekinsa nima bo‘ladi?”, degan Bayden “Associated Press” nashriga bergan intervyusida.

Uning qayd etishicha, Moskvaga qarshi moliyaviy sanksiyalar qo‘llashga qaror qilar ekan, u “saylovlar haqida o‘ylaydigan siyosatchi kabi emas, balki bosh qo‘mondon singari ish tutgan”.

Ayni paytda Davlat departamenti matbuot kotibi Ned Prays brifing chog‘ida jurnalistlarga Vashington sanksiyalarni Moskva uchun “iloji boricha og‘riqli” qilish niyatida ekanini aytgan.

“Bizning maqsadimiz – moliyaviy sanksiyalar, eksport nazorati va boshqa tegishli choralarni – Kreml uchun, asosiy qaror qabul qiluvchilar uchun imkon qadar og‘riqli qilish uchun qo‘limizdan kelganini qilamiz”, deydi Prays.

Qayd etish kerakki, Rossiya Ukrainaga hujum qilgach, AQSH unga qarshi ko‘plab sanksiyalar joriy qildi. Vashingtonning shaxsiy sanksiyalari Rossiya hukumati vazirlaridan tortib, Putinning o‘ziga va qizlariga ham ta’sir qildi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.


Maqola muallifi

Teglar

Rossiya-Ukraina urushi Ukrainaga bosqin

Baholaganlar

21

Reyting

3

Maqolaga baho bering

Doʻstlaringiz bilan ulashing