Bayden Ukraina uchun eng katta harbiy yordam paketini e’lon qildi

AQSH Prezidenti Jo Bayden bugun, 24 avgust kuni Ukrainaga AQSH tarixidagi eng katta 2,98 milliard dollarlik harbiy yordam paketi ajratilishini e’lon qildi. Bu haqda Oq uy tomonidan e’lon qilingan Prezident bayonotida so‘z boradi.  

"Qo‘shma Shtatlar Ukraina xalqi o‘z suvereniteti uchun kurashni davom ettirayotganda ularni qo‘llab-quvvatlashga sodiqdir. Ushbu majburiyatning bir qismi sifatida men bugungi kunga qadar eng katta xavfsizlik paketini e’lon qilishdan faxrlanaman: Ukraina xavfsizligini ta’minlash tashabbusi doirasida qurol va jihozlar uchun taxminan 2,98 milliard dollar ajratiladi”, deyiladi hujjatda. 

Bayonotda ta’kidlanganidek, bu Ukrainaga havo hujumidan mudofaa tizimlari, artilleriya tizimlari va o‘q-dorilar, shuningdek, uzoq muddatli mudofaa uchun uchuvchisiz havo hujumiga qarshi tizimlar va radarlarni olish imkonini beradi. 

Bayden, shuningdek, Ukraina xalqini mustaqillik bayrami tabriklab, bu kun Ukraina suveren va mustaqil davlatligi va shunday bo‘lib qolishining ishonchli tasdig‘i bo‘lib xizmat qilishini ta’kidladi.

Kecha, 23 avgust kuni "Associated Press" agentligi AQSHning Kiyevga qo‘shimcha harbiy yordam ajratish rejalari haqida xabar berdi. Agentlik ta’kidlaganidek, shu yo‘l bilan Amerika rahbariyati o‘rta va uzoq muddatli istiqbolda Ukrainaning mudofaa qobiliyatini mustahkamlash niyatida. Shu bilan birga, agentlikning ta’kidlashicha, Amerika rahbariyati ukrainalik harbiylarni mamlakat tashqarisida tayyorlash bo‘yicha sa’y-harakatlarni kuchaytirishni kutmoqda. 

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.