AQSH o‘z omadini sinadi. Baku va Yerevan yana sulhga erishdi

Bugun, 26 oktyabrda Ozarbayjon va Armanistonning kelishuvchi asosida Tog‘li Qorabog‘da yangi sulh kuchga kirdi.

Ozarbayjon Tashqi ishlar vaziri Jayxun Bayramov va Armaniston Tashqi ishlar vaziri Zograb Mnatsakanyanning AQSH Davlat kotibi o‘rinbosari Stiven Bigan bilan uchrashuv yakuniga ko‘ra, Tog‘li Qorabog‘da yangi gumanitar sulh e’lon qilindi.

Qo‘shma bayonot Amerika Davlat deparatmenti saytida e’lon qilindi. O‘t ochishni to‘xtatish rejimi 26 oktyabr soat 8:00 dan kuchga kirdi.

Armaniston Bosh vaziri Nikol Pashinyan mamlakati o‘t ochishni to‘xtatish rejimiga amal qilishga tayyorligini bildirdi. 

Ozarbayjon Mudofaa vazirligi ham Qorabog‘dagi barcha qarama-qarishilk chizig‘i bo‘ylab o‘t ochishni to‘xtatish rejimiga amal qilishini ma’lum qildi.

Eslatib o‘tamiz, Ozarbayjon va Armaniston Rossiya vositachiligida sulhga erishdi. Ammo bu sulhning umri bir necha soat davom etdi. Keyinroq, tomonlar yana o‘t ochishni to‘xtatishga qaror qildi. Bu safar ham rejim uzoqqa bormadi.

Rasmiy Bakuga ko‘ra, Armaniston Qurolli Kuchlari joriy yilning 27 sentyabr kuni soat 06:00 dan boshlab Ozarbayjonga qarshi keng ko‘lamli provokatsiyalarni amalga oshirdi, butun front bo‘ylab Ozarbayjon armiyasining pozitsiyalarini, shuningdek, oldingi chiziq zonasida joylashgan aholi punktlarini o‘qqa tutdi.

Armaniston hujum Ozarbayjon qurolli kuchlari tomonidan boshlanganini aytmoqda. Ozarbayjon esa qurolli to‘qnashuvga nisbatan javob hujumlari boshlaganini rasman e’lon qilib, Armaniston chegarasidagi tinch aholi vakillarini chegara hududlaridan chetga chiqishlarini so‘radi.

Holat bo‘yicha Ozarbayjon Respublikasi Prezidenti Ilhom Aliyev xalqqa murojaat bilan chiqib, to‘qnashuv Ozarbayjonning provokatsiyasi emasligini aytdi.

Nikol Pashinyan esa mamlakatda harbiy holat va umumiy safarbarlik e’lon qildi.  Buning ortidan Ilhom Aliyev mamlakatda harbiy holat va komendantlik soati e’lon qilish haqidagi farmonga imzo chekdi. Shuningdek, Aliyev 28 sentyabr kuni qisman safarbarlik e’lon qilish haqidagi hujjatni imzoladi. 

Ozarbayjon va Armaniston o‘rtasida keskinlik avj olgandan keyin Tashqi ishlar vaziri Sergey Lavrov ikki mamlakat Tashqi ishlar vazirlari bilan telefon orqali muloqot qilib, ularni muzokaralar stoliga qaytishga chaqirgan edi. Prezident Vladimir Putin esa Nikol Pashinyan bilan muloqot qilib, masalani tinch yo‘l bilan hal etishni tavsiya qildi. Bu orada Ozarbayjon Prezidenti Ilhom Aliyev asosiy kuch va dastakni Turkiya Respublikasidan olayotgani ma’lum bo‘ldi. Shu kuni Turkiya va Ozarbayjon Prezidentlari telefon orqali muloqot qildilar va Erdo‘g‘an turk xalqi va davlati Ozarbayjonni bor imkoniyati bilan qo‘llab-quvvatlashini eslatdi. 

Ozarbayjon va Armaniston o‘rtasidagi Tog‘li Qorabog‘ mojaroli zonasidagi vaziyat ko‘p jihatdan Rossiyaga bog‘liq. Rossiya Birlashgan Millatlar Tashkiloti Xavfsizlik Kengashining doimiy a’zosi, shuningdek Yevropada xavfsizlik va hamkorlik tashkiloti Minsk guruhining hamraisi. 1 oktyabr kuni guruh hamraislari – AQSH, Rossiya va Fransiya Tog‘li Qorabog‘ masalasida qo‘shma bayonot e’lon qildilar.