10 ming chechen askarlari Ukrainaga borishga tayyorlanmoqda

Checheniston poytaxti Grozniyda 10 ming chechen harbiylari maxsus harbiy operatsiyada qatnashish uchun Ukrainaga jo‘nashga hozirlik ko‘rmoqda. Harbiylar qarshisida Checheniston rahbari Ramzan Qodirov chiqish qilgan.

Uning ta’kidlashicha, Ukraina rahbari Vladimir Zelenskiy sobiq Prezidentga aylanib qolmasidan oldin Rossiya Prezidenti Vladimir Putinga telefon qilib, kechirim so‘rashi kerak.

“Fursatdan foydalanib, men amaldagi Prezident Zelenskiyga maslahat bermoqchiman. U Ukrainaning sobiq Prezidenti bo‘lishidan oldin Bosh qo‘mondonimiz, Prezident Vladimir Vladimirovichga qo‘ng‘iroq qilib, kechirim so‘rashi kerak”, deydi Ramzan Qodirov.

Ba’zi ommaviy axborot vositalariga ko‘ra, Ukrainaga 10 ming chechen harbiylarining kirishi shunchaki uyushtirilgan bo‘lishi ham mumkin. Maqsad esa dushmanning ruhiyatini sindirish.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Buning ortidan Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirdi. Ko‘p o‘tmay Prezident Rossiya bilan diplomatik aloqani uzdi.

Rus qo‘shinlari dastlab Kiyev va Xarkovga raketa hujumi uyushtirdi. Prezident Zelenskiy mamlakatda harbiy holat e’lon qildi. Shuningdek, rasmiy idora rus qo‘shinlari Xarkov va Odessa viloyatiga kirib borganini bildirdi.

Hujum boshlanganidan ko‘p o‘tmay, LXR Ichki ishlar vaziri maslahatchisi Vitaliy Kiselev Schaste va Stanitsa shaharchalari LXR nazoratiga o‘tganini e’lon qildi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.