ЕИ Россия иқтисодиётини қулатмоқчи 

Европа Иттифоқи Россияга қарши кенг қамровли иқтисодий уруш бошлаш ниятида. Бу ҳақда Франция Молия вазири Брюно Ле Мэр маълум қилди.

"Биз Россияга қарши кенг қамровли иқтисодий ва молиявий уруш бошлаймиз", дейди Ле Мэр.

Унинг сўзларига кўра, Ғарб томонидан Россияга нисбатан жорий этилган санкциялар жуда самарали. Шунингдек, Ле Мэр расмий Москвага қарши кўрилган чоралар Европа Иттифоқи мамлакатлари иқтисодиётига ҳам таъсир қилиши мумкинлигини айтган. Шунга қарамай, у Европа эмас, Россия жабр кўришини урғулаган. 

Бундан ташқари, Лэ Мэр Европа Иттифоқи томонидан Россияга қарши жорий қилинган санкциялар унинг иқтисодини вайрон қилишини айтиб ўтган. 

“АҚШ ва Европа биргаликда сайёрадаги энг қудратли иқтисодий блокни ташкил қилади. Биз Россия иқтисодиётининг қулашига олиб келамиз”, дейди вазир. 

Унга кўра, Россиянинг музлатиб қўйиладиган активлари миқдори 1 триллион долларни ташкил этади ҳамда Ғарб, агар керак бўлса, “санкцияларни янада кучайтиришга” тайёр.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.

Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.

Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.