Украина ҳарбийлари русларга қарши ҳужумга ўтди – ИИВ

Олам

image

Украина Қуролли Кучлари мудофаа режимида бўлиб, Киев вилоятининг айрим ҳудудларида Россия ҳарбийларига қарши ҳужумга ўтди. Бу ҳақда Украина Ички ишлар вазирлиги раҳбари маслаҳатчиси Вадим Денисенко маълум қилган

Қайд этилишича, ўтган кун давомида украиналик ҳарбийлар 12 та танкни, бир нечта самолётни, ўнга яқин зирҳли техникани, 300 дан ортиқ рус ҳарбийларини йўқ қилган. Баришевки, Гостомеля ва Ирпеня ҳудудларида эса жиддий жанглар кетмоқда. 

“Шунинг учун биз сафда турибмиз, Киев вилоятида қарши ҳужумларни бошлаяпмиз”, дейди вазир маслаҳатчиси.

Денисенкога кўра, Украина Қуролли Кучларининг Киев яқинидаги муваффақиятли қарши ҳужуми Британия разведкаси томонидан ҳам тасдиқланган. Россия ҳарбийлари эса озиқ-овқат тақчиллиги, ёнилғи муаммоларига дуч келишда давом этмоқда.

Кеча, 24 март куни  Бучанск шаҳар кенгаши Украина ҳимоячилари Ирпин, Буча ва Гостомелни қуршаб олишга муваффақ бўлганини маълум қилди. Бироқ, кўплаб қўшни қишлоқлар ҳамон Россия ҳарбийлари назорати остида.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


 


Мақола муаллифи

Теглар

Россия-Украина уруши Украинага босқин

Баҳолаганлар

70

Рейтинг

3

Мақолага баҳо беринг

Дўстларингиз билан улашинг