Россияда Instagram тўлиқ блокланадиган сана айтилди

Технология

image
0:00
0:00
download

Жорий йилнинг 14 март куни Россияда Американинг Instagram ижтимоий тармоғи блокланади. Бу ҳақда ижтимоий тармоқ раҳбари Адам Моссери Twitter'да маълум қилган

“Душанба куни Россияда Instagram блокланади”, деб ёзган Моссери, бундай қарор нотўғри эканини урғулаб.

Унинг фикрича, ижтимоий тармоқни блоклаш “Россиядаги 80 миллион фойдаланувчини бир-бири билан ва бутун дунё билан мулоқот қилишдан маҳрум қилади”.

Адам Моссерига кўра, Россиядаги фойдаланувчиларнинг тахминан 80 фоизи мамлакатдан ташқаридаги аккаунтларга обуна бўлган.

Маълум қилинишича, кеча, 11 март куни Роскомнадзор (Алоқа, ахборот технологиялари ва оммавий  коммуникацияларни назорат қилиш федерал хизмати) жорий йилнинг 14 март куни ярим тунда Instagram'га киришни чеклашга қарор қилган. Ушбу қарор Instagram'да россияликлар, жумладан, ҳарбий хизматчиларга нисбатан зўравонлик ҳаракатларини содир этишга чақириқлар тарқалаётгани сабаб қабул қилинган. 

Аввалроқ, Россия Бош прокуратураси Meta'ни экстремистик ташкилот деб тан олишни ва унинг Россия Федерацияси ҳудудидаги фаолиятини тақиқлашни талаб қилаётгани ҳақида хабар бергандик.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинаг босқин

Баҳолаганлар

45

Рейтинг

3.1

Мақолага баҳо беринг

Дўстларингиз билан улашинг