Россия Луганскда ҳам йўқотишларга учрамоқда – УҚК
Олам
−
02 Апрель 2022
15399Россия Қуролли Кучлари (РҚК) бўлинмалари Украинанинг Луганск вилоятидаги жангларда сезиларли йўқотишларга учрамоқда. Бу ҳақда бугун, 2 апрель куни Украина Бош штаби маълум қилди.
Украина Қуролли Кучлари (УҚК) Россия кучларининг айрим йўналишларда ортга чекиниши, Слобожанский, Донецк ва Луганск йўналишларида ҳужум операцияларини кучайтириш учун қилинган бўлиши мумкинлигини таъкидлаган.
Россия Луганскда йўқотишларга учраётгани таъкидланиб, ўтган ҳафта давомида РФ Қуролли Кучларининг 2-Армия Корпуси деб аталадиган бўлинмаларида йўқотишлар тахминан 800 кишини ташкил этган.
Украина Қуролли Кучларининг Донецк ва Луганск йўналишларидаги гуруҳлари кунига 9 та ҳужумни қайтарган, 8 та танк, 44 та зирҳли жанговар машина, 16 та машина ва 10 та артиллерия тизимини йўқ қилган.
УҚКга кўра, Россия қўмондонлиги Украина билан чегарада провокацияларни амалга ошириш учун Молдованинг Приднестровье-Молдавия Республикаси ҳудудида жойлашган ҳарбий бўлинмаларини жалб қила бошлаган.
Аввалроқ Украина қўшинлари мамлакат жанубида ва Киев вилоятидаги ҳудудларни озод қилишда муваффақиятларга эришаётгани айтилганди.
Россия-Украина уруши
Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.
Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.
24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.
Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.
25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.
Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.
Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.
Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.
Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.
LiveБарчаси