Россия Путиннинг маъшуқасига санкция киритган Австралияга жавоб қайтарди

Олам

image

Россия Федерацияси 39 нафар австралияликнинг мамлакатга киришини тақиқлади. Бу ҳақда бугун, 21 июль куни Россия ТИВ тарқатган баёнотда келтирилган.

“Расмий Канберранинг австралиялик “Магницкий қонуни” аналоги бўйича санкциялар қўллаш тўғрисидаги олдинги қарорига жавобан Россия Федерацияси ўзаро келишув асосида Австралиянинг ҳуқуқни муҳофаза қилиш идоралари вакилларидан қўшимча равишда 39 кишини санкциялар рўйхатига киритди”, дейилади хабарда.

“Қора рўйхат”га тушганлар орасида Австралия Ички ишлар вазири ўринбосарлари Марк Эблонг ва Эндрю Кеффорд, “Serco” инфратузилмаси бошқарувчи директори Бэн Бэйот, Австралия чегара қўриқлаш комиссари Майкл Оутрэм ҳам бор.

“Уларнинг Россия Федерациясига кириши тақиқланади”, дейилади Россия баёнотда.

Аввалроқ, Австралия Украинадаги уруш муносабати билан 16 нафар россияликга нисбатан шахсий санкциялар жорий қилгани ҳақида хабар берган эдик. Мазкур “қора рўйхат”га миллиардер Год Нисанов, Владимир Путиннинг қариндошлари — Роман, Михаил ва Игорь Путин ҳамда Алина Кабаева ҳам киритилганди. 

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши

Баҳолаганлар

61

Рейтинг

3.1

Мақолага баҳо беринг

Дўстларингиз билан улашинг