“Махсус операция”дан олдин Украинадан Россияга ҳужум тайёрланганди – Полянский

НАТО Россияга қарши прокси уруш олиб бормоқда. Россия Федерациясининг БМТдаги доимий вакилининг биринчи ўринбосари Дмитрий Полянский “махсус операция” бошида украиналик ҳарбийларнинг Россияга зарба бериш режалари ҳақидаги ҳужжатлар топилганини маълум қилди. Бу ҳақда дипломат “Sky News” телеканали эфирида маълум қилди.

“Ҳозир бизда НАТО билан прокси уруш бор. НАТО Россия билан прокси уруш изламоқда. Бу биз дуч келадиган ҳақиқат. “Махсус ҳарбий операция” бошида топилган ҳужжатлар, далиллар, Украина ҳудудидан Россияга зарба беришнинг аниқ режалари, шунингдек, Донбассга зарба беришнинг аниқ режалари бўлганлигини тасдиқлайди”, деган Полянский.

Дипломатнинг қайд этишича, “махсус ҳарбий операция” олдиндан берилган зарба бўлган. У бу уруш БМТ Низомига мувофиқ бошланганини таъкидлаган.

“Биз буни БМТ Низомининг 51-моддасига тўлиқ риоя қилган ҳолда қилдик. Бу ҳақда БМТни хабардор қилдик”, деган Россия Федерацияси доимий вакилининг биринчи ўринбосари.

Шу ўринда қайд этиш керакки, БМТнинг ўз Россиянинг ҳаракатларини бир неча марта қоралаб, зудлик билан урушни тўхтатишга чақирди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.