Зеленский Байдендан Абрамовичга санкция киритмасликни сўради – ОАВ

Украина Президенти Владимир Зеленский АҚШ Президенти Жо Байденга россиялик тадбиркор Роман Абрамовичга нисбатан вақтинча чеклов чораларини қўлламасликни маслаҳат берди, чунки у Россия билан музокараларда ёрдам бериши мумкин. Бу ҳақда “Wall Street Journal” манбаларга таяниб хабар берди.

Нашрнинг ёзишича, март ойи бошида АҚШ Молия вазирлиги ходимлари Абрамовичга қарши санкциялар тайёрлаган, бироқ ЕИ ва Буюк Британия билан параллел равишда чора-тадбирлар эълон қилиш вақти келганида, Оқ уйдаги Миллий хавфсизлик кенгаши Ғазначиликдан бу чора-тадбирлардан воз кечишни сўраган.

“Сабаб: Украина Президенти Владимир Зеленский яқинда бўлиб ўтган телефон суҳбатида Президент Байденга тинчлик музокараларида Россия бўйича муҳим воситачи бўла оладиган олигархга нисбатан санкциялар қўллашга шошмай туришни маслаҳат берган”, дейилади нашр хабарида.

Тадбиркорнинг вакили Абрамовичнинг музокаралар жараёнидаги иштироки ҳақида изоҳ беришдан бош тортган. 

Буюк Британия ҳукумати 10 март куни россиялик етти тадбиркорга, жумладан, Англиянинг “Челси” футбол клуби хўжайини Роман Абрамовичга қарши санкциялар жорий қилди. Кейинроқ Европа Иттифоқи ҳам Абрамовичга қарши санкциялар киритди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.