Ukrainada Rossiya va Belarusning $21 mlndan ortiq mulki hibsga olindi

Ukrainada Rossiya va Belarusdagi korxonalarning 21,3 million dollardan ortiq mol-mulki, jumladan 420 ta vagon hibsga olindi. Bu haqda bugun, 8 iyun kuni Ukraina Bosh prokuraturasi Matbuot xizmati ma’lum qildi.

“Bosh prokuratura Rossiya Federatsiyasi va Belarusning 500 million grivnadan ortiq [taxminan 16,9 million dollar] 420 ta temir yo‘l vagonlari hamda 130 million grivnadan ortiq [taxminan 4,4 million dollar] inventar buyumlarini olib qo‘ydi”, deyiladi prokuraturaning xabarida.

Aniqlik kiritilishicha, qasddan soliq to‘lashdan bo‘yin tovlash fakti bo‘yicha Iqtisodiy xavfsizlik byurosi tomonidan tergovga qadar  tekshiruv harakatlari olib borilmoqda. 

“Tekshiruv davomida Rossiya va Belarus korxonalarining mansabdor shaxslari 2022 yilda Ukraina hududiga temir yo‘l vagonlarini Ukraina bojxona qonunchiligini buzgan holda olib kirgani aniqlandi”, deyiladi xabarda.

Avvalroq, Ukraina Iqtisodiy xavfsizlik byurosi direktori Vadim Melnik mamlakatda umumiy qiymati 1 milliard dollardan ortiq bo‘lgan Rossiya va Belarus aktivlari hibsga olinganini ma’lum qilgandi.

Bundan tashqari, Ukraina Davlat tergov byurosi Rossiyaning “Tatneft” kompaniyasining 115 ta ko‘chmas mulki, hisob raqamlari va korporativ huquqlarini hibsga olgan.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.