Россия чўкиб кетган“Москва” флагманига ўринбосар топгани айтилмоқда

Олам 8975
image

Россия Федерациясининг босиб олинган Қримдаги Қора денгиз флотининг Украина томонидан чўктириб юборилган “Москва” ракета крейсери ўрнига янги флагман олди. Бу ҳақда украиналик журналист Роман Цимбалюк ёзган.

Унга кўра, эндиликда “Адмирал Макаров” фрегати Қора денгиз флотининг флагмани бўлади.

“Қора денгиз флоти қўмондонлиги 14 апрель куни вайрон қилинган “Москва” ракета крейсери ўрнига янги флагманни тайинлашга қарор қилди. Бу ҳозирда Қора денгиз флотининг ишчи гуруҳи жойлашган 11356Р лойиҳасининг “Адмирал Макаров” фрегати бўлди”, деб ёзган Цимбалюк.

“Адмирал Макаров” – 2017 йилда фойдаланишга топширилган. У 11356Р лойиҳасига кирувчи учта кеманинг сўнггиси. Қолган икки кема “Адмирал Эссен”ва “Адмирал Григорьевич” 2000-йилларда қуриб битказилган. Ҳозирда улар ҳам Қора денгизда бўлиб турибди.

Эслатиб ўтамиз, 14 апрель куни тунда Одесса яқинида жойлашган “Москва” крейсерида портлаш юз берди. Украина томони кемага “Нептун” билан зарба берганини билдирди.

Россия ўз навбатида кемадаги ўқ-дорилар портлаганини, бу номаълум сабаб билан бошланган ёнғин туфайли эканини хабар берди. Рус нашрлари кеманинг 500 дан ортиқ экипаж аъзолари эвакуация қилингани айтилди.

Кейинроқ эса кемадаги ёнғин ўчирилди ва у сузишга яроқли ҳолда экани очиқланди. Бироқ бугун, 15 апрель куни тунда “Москва” буксер қилинаётганда довул сабаб чўкиб кетди.

Қора денгиз стратегик тадқиқот институти раҳбари Андрей Клименкога кўра, 16 та қанотли ракетага эга “Москва” крейсери йўқ қилинганидан кейин Россия Қора денгиз флоти кемаларининг умумий қанотли ракеталари сони 72 тадан 56 тага камайди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Суннатилла Абдуллаев
Мақолага баҳо беринг
Баҳолаганлар: 10
Рейтинг: 3.2
t
×