НАТО урушга кирадими? Столтенберг альянснинг фавқулодда саммитида нимага келишилганини очиқлади

Олам

image

НАТО Украинага қўшин юбормайди, чунки бу Россия билан кенг кўламли можарога олиб келади.  Бу ҳақда бугун, 24 март куни бўлиб ўтаётган НАТО Бош котиби Йенс Столтенберг альянснинг бугун, 24 март куни ўтказилган фавқулодда саммити якунлари бўйича матбуот анжуманида айтиб ўтди. 

"Биз [Украинадаги] бу можаро НАТО ва Россия ўртасидаги урушга айланиб қолмаслигини таъминлашга масъулмиз. Шунинг учун мен Украинага ўз қўшинларимизни киритмаслигимизни аниқ айтдим, чунки бунинг йўли – Россия билан кенг кўламли можарода иштирок этишга тайёр бўлиш”, дейди у Польшанинг Украинага тинчликпарвар миссиясини юбориш таклифи ҳақидаги саволга жавоб берар экан.

Аммо НАТО Украинани кимёвий, биологик ва ядровий қуроллардан, шунингдек,  ибермудофаадан ҳимоя қилиш учун ускуналар беради. Бу ҳақда Столтенберг шундай дейди: 

“Биз Украинага кўпроқ ёрдам кўрсатишга қарор қилдик, жумладан, кибертаҳдидлар, биологик, кимёвий ва ядровий қуроллардан мудофаа учун. Бу ёрдам аниқлаш, ҳимоя қилиш ва тиббий таъминот, шунингдек, инқирозни бошқаришни ўз ичига олади”. 

Столтенбергнинг таъкидлашича, Россия Украинада кимёвий қурол қўллаш учун баҳона яратишга уринмоқда. 

“Биз хавотирдамиз, чунки Украина ва НАТОга қарши айбловлар билан баҳона яратишга уринаётган Россия риторикасини кўриб турибмиз. Кимёвий қурол ишлатиш учун бундай баҳоналар яратилганига аввал ҳам гувоҳ бўлганмиз.  у айбловлар мутлақо ёлғон”, дейди у. 

Унинг сўзларига кўра, Украинада кимёвий қурол қўлланилиши “можаронинг моҳиятини бутунлай ўзгартиради ва кенг тарқаладиган оқибатларга олиб келади”.

Ҳарбий ёрдам

Столтенберг, НАТО Украинага Президент Владимир Зеленскийнинг илтимосидан келиб чиқиб, ҳарбий ёрдам беришини айтди. 

“Президент Зеленский бизга мурожаат қилди ва қўшимча ҳарбий ёрдам катта аҳамиятга эга эканлигини таъкидлади. Бугун НАТО етакчилари Украинага бундан кейин ҳам ёрдам кўрсатишимиз керак ва кўрсатамиз деган фикрга келишди”, дейди Столтенберг. 

Унинг сўзларига кўра, НАТО “Россияга нисбатан мисли кўрилмаган санкциялар қўллашда ва иттифоқчиларнинг қарши чоралари ва мудофаасини кучайтиришда” давом этади.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

НАТО Россия-Украина уруши Украинага босқин

Баҳолаганлар

61

Рейтинг

3.1

Мақолага баҳо беринг

Дўстларингиз билан улашинг