МИБ ходимлари алиментдан қочган эркак учун “махсус учрашув” уюштирди

north_east

Ўзбекистонда қанча она фарзандларига алимент тўлаб келаётгани айтилди

Ижтимоий тармоқларда Андижон вилоятида Мажбурий ижро бюроси ходимлари қарздордан пулни ундириш учун қиз бола ролини ўйнаб, “махсус учрашув” ташкил қилгани ҳақида хабарлар тарқалди. QALAMPIR.UZ ҳолатга аниқлик киритиш учун Мажбурий ижро бюроси матбуот котиби Фаррух Тошпўлатов билан боғланди.

Унинг маълум қилишича, Шаҳрихон туманида яшовчи қидирувдаги эркак 1 йилдан буён вояга етмаган фарзандини боқишдан бўйин товлаб келган ва унинг қарздорлиги 31 миллион сўмга етган. МИБ ходимлари қиз бола номидан Telegramʼда у билан романтик ёзишмаларни бошлаган ва қарздор кафега таклиф қилинган. Алиментчи ота бугун, 1 август куни “учрашув”га келган вақтида қўлга олинган.

Эслатиб ўтамиз, аввалроқ Фарғонада алимент тўлашдан қочиб, парда ортига яширинган ота қамалганди. Ўтган йили Қашқадарёда алимент тўламасдан қочиб юрган эркак уйидаги кўрпалар тагидан, Наманганда ва Сурхондарёда уй ертўласидан, Хоразмда товуқ фермасидан, Фарғона шаҳрида тунги клубдан, Андижонда холасининг ва Бухорода бувисининг уйидан топилганди. Шунингдек, илгарироқ Сурхондарё вилоятида вояга етмаган бир фарзандининг моддий таъминоти учун алимент тўлашдан бўйин товлаган ота укасининг никоҳ тўйида ушланганди. Андижон вилоятида эса алимент тўлашдан қочиб юрган ота ўз уйининг қурилиши тугалланмаган ҳудудида шифер ортидан топилган.