Алимент тўлашдан қочиб юрган ота тўйхонада ушланди

Сурхондарё вилоятида вояга етмаган бир фарзандининг моддий таъминоти учун алимент тўлашдан бўйин товлаган ота укасининг никоҳ тўйида ушланди. Бу ҳақда ЎзА хабар берди.

Қайд этилишича, суднинг 2020 йил июль ойидаги буйруғи билан қарздор ота А.Қ. алимент тўлаши белгиланган бўлса-да, у йиллар давомида йиғилиб қолган қарийб 36 миллион сўм маблағни тўлашдан бўйин товлаган. Бу қилмиши учун унга ўтган йил август ойида 15 сутка маъмурий қамоқ жазоси тайинланган. Бу жазодан ҳам тегишли хулоса чиқармаган қарздор ота алимент пулини тўлашдан қасддан бўйин товлаб келгани учун МИБ Сурхондарё вилоят бошқармаси жиноят иши қўзғатиб, суриштирув ва тергов ҳаракатларини бошлаган.

Билдирилишича, боласига алимент тўламаслик мақсадида МИБдан яширингани учун унга қидирув эълон қилиниб, ички ишлар органлари ходимлари ҳамкорлигида тезкор қидирув тадбирлари ўтказилган. Натижада қарздор ота укасининг никоҳ тўйида қўлга олинган.

“У Термиз шаҳридаги муҳташам тўйхоналардан бирида димоғи чоғ ўтирганида топилиб, ушланди. Бу қилмишидан пушаймон бўлган А.Қ. қонунда белгиланган жавобгарлик муқаррарлигини англаган ҳолда йиғилиб қолган алимент қарздорлигини тўлиқ тўлашга мажбур бўлди”, дейилади хабарда.

Эслатиб ўтамиз, аввалроқ Фарғонада алимент тўлашдан қочиб, парда ортига яширинган ота қамалганди. Ўтган йили Қашқадарёда алимент тўламасдан қочиб юрган эркак уйидаги кўрпалар тагидан, Наманганда ва Сурхондарёда уй ертўласидан, Хоразмда товуқ фермасидан, Фарғона шаҳрида тунги клубдан, Андижонда холасининг ва Бухорода бувисининг уйидан топилганди.