Алимент тўловчиларга четга чиқишга рухсат берилиши мумкин

Ўзбекистонда алимент тўловчиларга ҳам четга чиқиб ишлашга рухсат берилиши мумкин. Бу ҳақда бугун, 13 март куни Президент Шавкат Мирзиёев раислигида ўтаётган аҳоли мурожаатлари билан ишлаш тизимини такомиллаштириш юзасидан видеоселектор йиғилишида маълум қилинди.

Йиғилишда қайд этилишича, ўтган йили алимент билан боғлиқ 70 минг мурожаат келиб тушган. Мажбурий ижро бюроси алимент бўйича ариза тушса, ундириб бераётгани, лекин алимент тўловчининг расмий даромади бўлмагани учун мурожаатларнинг 30 фоизи ҳал қилинмасдан қолаётгани кўрсатиб ўтилган.

Бу борада ҳокимлар алимент тўловчиларнинг қанчасининг касби бор, лекин ишсиз, қанчасини ўқитиш кераклигини таҳлил қилмаётгани, шундан келиб чиқиб, бандлик бўлими ва “маҳалла еттилиги” олдига аниқ масала қўймаётгани танқид қилинган.

Ҳудудларда ишларни шу тартибда ташкил қилса, алимент бўйича мурожаатлар 2 карра камайиши мумкинлиги қайд этилган.

Ташкилий миграция асосида одамларни ўқитиб, чет элдаги юқори даромадли ишларга юбориш бўйича тизим яратилган. Лекин алимент мажбурияти бўлган одамлар бу имкониятдан фойдалана олмаяпти, чунки фуқаро четга чиқиши учун 5 йиллик алимент пулини олдиндан тўлаши ёки алимент олувчидан ёзма розилик олиши керак.

Мутасаддиларга бу масалани чуқур ўрганиб, тегишли таклиф киритиш топширилган.