Алина Кабаева яна бир мамлакатда “запрет”га тушди

Канада ҳукумати Россия Федерациясига нисбатан санкциялар рўйхатига яна тўрт компания ва 22 нафар жисмоний шахсни қўшди. Бу ҳақда бугун, 31 май Канада ҳукумати сайтида маълум қилинди. 

Хусусан, Олимпиада чемпиони Алина Кабаева, Россельхозбанк ва Инвестторгбанк санкциялар рўйхатига қўшилган. 

Санкциялар рўйхатига кириш Канададаги мумкин бўлган активларни музлатиш ва мамлакатга киришни тақиқлашни англатади. 

Аввалроқ, Канада Ташқи ишлар вазирлиги баёнотида, 2022 йил 24 февралдан бери Украинада давом этаётган вазият муносабати билан Оттава Россия Федерацияси, Беларусь ва Украинанинг мингдан ортиқ жисмоний ва юридик шахсларини санкциялар рўйхатига қўшгани таъкидланган эди. 

Ташқи сиёсат идораси раҳбари Мелани Жоли бир неча бор таъкидлаганидек, Канада Украинадаги вазият туфайли Москвага қарши санкциялар сиёсатини давом эттириш ниятида. 

Маълумот ўрнида, гимнастикачи Алина Кабаева Россия Федерацияси Президенти Владимир Путин билан ишқий муносабатда бўлган деб кўрилади. У бундан аввал Европа Иттифоқи ва Буюк Британия санкциялари рўйхатига киритилган эди. 

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.