Ўзбекистон Сан-Маринога биринчи элчисини юборди

Ўзбекистоннинг Сан-Маринога тайинланган биринчи элчиси Абат Файзуллаев (қароргоҳи Римда жойлашган) мазкур давлат раҳбарлари – Капитан-регентлар Франческа Чиверкья ва Далибор Риккардига ишонч ёрлиқларини топширди. Бу ҳақда “Дунё” ахборот агентлиги хабар берди.

Қайд этилишича, тантанали маросимда Сан-Марино Ташқи ишлар вазири Лука Беккари сўзга чиқиб аккредитациядан ўтган элчиларни олқишлаган. Вазир Лука Беккари Ўзбекистон Президенти Шавкат Мирзиёев ташаббуси билан мамлакатда олиб борилаётган кенг кўламли иқтисодий ва демократик ислоҳотларни, Ўзбекистон ва Сан-Марино ўртасидаги алоқаларни ривожлантиришга қаратилган саъй-ҳаракатларни, жумладан ушбу мамлакатга биринчи элчининг тайинланишини юқори баҳолаган.

“Ўзбекистоннинг иқлим ва атроф-муҳит билан боғлиқ муаммоларга қарши курашишда ҳамда барқарор ривожланиш йўлида олиб бораётган оқилона сиёсати юксак баҳоланди.

Шунингдек, ўзаро савдо-иқтисодий ҳамкорликни ривожлантириш, икки томонлама шартнома-ҳуқуқий базани мустаҳкамлаш, кўп томонлама ҳамкорлик йўналишида, хусусан, БМТ ва ЕХҲТ доирасида номзодлар ва ташаббусларни ўзаро қўллаб-қувватлаш каби мавжуд манфаатли шерикликни давом эттиришга ишонч билдирилди”, дейилади хабарда.

Таъкидлаш жоиз, Ўзбекистон ва Сан-Марино ўртасидаги дипломатик муносабатлар 2021 йил 3 февралда ўрнатилган. Сан-Марино дунёдаги энг кичик давлатлардан бири. У Жанубий Европада жойлашган бўлиб, ҳар томондан Италия ҳудуди билан ўралган. 

Маълумот учун, Абат Файзуллаев 2023 йил ноябрь ойидан буён Ўзбекистоннинг Италиядаги элчиси ва Римдаги халқаро ташкилотлар (ФАО, ҚХРХЖ, БООД) ҳузуридаги доимий вакили ҳамда 2024 йил декабрь ойидан бошлаб Ўзбекистоннинг Кипрдаги элчиси сифатида фаолият юритиб келмоқда. У Ўзбекистоннинг Мальтадаги ҳам биринчи элчиси саналади. Шу ой бошида Абат Файзуллаев Мальта Президенти Мириам Спитери Дебонога ишонч ёрлиқларини топширди.

Абат Файзуллаев 2020-2023 йилларда Ўзбекистоннинг Австриядаги ва ўриндошлик асосида Венгриядаги элчиси сифатида ишлаган. У бир вақтнинг ўзида Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили лавозимида фаолият олиб борган.