Yevropa komissiyasi Putinning talabini bajarish uchun yo‘l ochdi

Olam

image

Yevropa kompaniyalari Rossiya gazi uchun to‘lovni rublda amalga oshirishi mumkin va bu sanksiyalarni buzish hisoblanmaydi. Bu haqda Yevropa Ittifoqiga a’zo davlatlarga yuborilgan Yevrokomissiya hujjatida keltirilgan.

“Reuters” agentligining hujjatga tayanib yozishicha, gaz kompaniyalari Rossiya tomonidan taklif qilingan energiya to‘lovi sxemasiga rozi bo‘lishi mumkin, biroq sanksiyalar bilan kiritilgan cheklovlardan voz kechish tartibi hali to‘liq aniq emas.

Joriy yilning 1 aprel kuni Rossiya Prezidenti Vladimir Putin tomonidan imzolangan Rossiya gazining “do‘st bo‘lmagan mamlakatlar”ga yetkazib berilgani uchun to‘lovlarni rublga o‘tkazish to‘g‘risidagi farmon kuchga kirdi. Avvalroq, “Bloomberg” yozganidek, Yevrokomissiya gaz uchun to‘lovni rublda amalga oshirish joriy qilingan sanksiyalarni buzish deb hisoblagan.

Yevropa Ittifoqi mamlakatlari bu borada yagona pozitsiyaga ega emas. 13 aprel kuni Avstriya kansleri Karl Nexammer uning mamlakati Germaniya, Vengriya va Bolgariya bilan birgalikda Rossiya gazi yetkazib berish embargosiga qarshi ekanini aytdi. 

Shuningdek, Italiya Rossiya talab qilayotgan gaz uchun yangi to‘lov shartlarini Yevropa Ittifoqi tomonidan bu xatti-harakatlarni Rossiyaga qarshi sanksiyalarning buzilishi sifatida tan olsa, bajarishdan bosh tortishi ham ma’lum bo‘ldi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.


Maqola muallifi

Teglar

Baholaganlar

231

Reyting

3.1

Maqolaga baho bering

Doʻstlaringiz bilan ulashing