O‘zbekiston kompaniyalari Rossiya bilan oldi-berdini rublga o‘tkazdi

O‘zbekiston ham Rossiyaga qo‘yilgan AQSH va G‘arb sanksiyalari foniga o‘zaro tovar ayirboshlashni rublda amalga oshirishni boshladi. Xususan, Rostovdagi gilam ishlab chiqaruvchi "Shaxinteks" kompaniyasi Yeropalik yetkazib beruvchilarni almashtirib, O‘zbekistonning kompaniyasi bilan rubl hisob-kitoblariga o‘tdi. Bu haqda bugun, 11 aprel kuni Rostov viloyati hukumatining Telegram -kanalida xabar berildi. 

Rostovdagi "Shaxinteks" [gilam mahsulotlari ishlab chiqaruvchi kompaniyasi Yevropa yetkazib beruvchilar o‘rnini bosuvchi, ishlab chiqarish uchun asosiy xom ashyo yetkazib beruvchiga aylangan Buxorodagi kompaniya bilan qo‘shma loyihani yo‘lga qo‘ydi. Tomonlar o‘zaro hisob-kitoblarda  rublga o‘tishga kelishib oldilar”, deyiladi xabarda. 

Bundan tashqari, “Rostselmash” OAJ O‘zbekistondagi Chirchiq qishloq xo‘jaligi mashinasozligi zavodi bilan birgalikda g‘alla va yem-xashak o‘rish kombaynlari, traktorlar ishlab chiqarishni mahalliylashtirdi. 

Hisobotda shuningdek, pestitsidlardan foydalanishni 70 foizgacha kamaytiradigan o‘g‘it ishlab chiqaruvchi va yetkazib beruvchi “Urojay XXI” O‘zbekistonda “Agro Urojay” sho‘ba korxonasini ochgani qo‘shimcha qilingan. 

Ta’kidlanishicha, Rostov kompaniyasining o‘g‘itlari mahsulot tannarxini sezilarli darajada kamaytirishi mumkin, bu esa o‘zbekistonlik qishloq xo‘jaligi ishlab chiqaruvchilari uchun foydalidir.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.