Sud Imomo‘g‘lini qamoqqa olishga qaror qildi
Olam
−
23 mart 8974
Istanbul shahri hokimi Ekrem Imomo‘g‘li Istanbul Bosh prokuraturasi tomonidan Istanbul shahar hokimligiga qarshi ochilgan korrupsiya tergovi doirasida hibsga olindi. Bu haqda CNN Turk xabar berdi.
Istanbul Bosh prokuraturasi Imomo‘g‘li va 99 gumonlanuvchiga nisbatan jinoiy tashkilot yetakchisi bo‘lish, jinoiy tashkilotga a’zolik, tovlamachilik, poraxo‘rlik, malakali firibgarlik, shaxsiy ma’lumotlarni qonunga xilof ravishda qo‘lga kiritish va tender savdolarini soxtalashtirish kabi ayblovlar bilan boshlangan tergov ishlarini davom ettirmoqda.
Sud hali terrorizm tergovi doirasida qaror qabul qilgani yo‘q. Ish bo‘yicha tergov davom etayotgani bildirildi.
19 mart kunidan buyon qo‘lga olingan 89 nafar gumonlanuvchining 5 nafari jinoiy tashkilot tashkil etish va boshqarish, pora olish, tovlamachilik, shaxsiy ma’lumotlarni olish va takliflarni soxtalashtirish, 84 nafari jinoiy tashkilotga a’zolik, pora olish va pora berish kabi jinoyatlar bo‘yicha sudga yuborilgan.
Sudya hay’ati Ali Ilbak, Adem Tunsay, Ahmet Koksal, Ali Nuhog‘li, Eyup Suboshi, Komil Timur Delibosh, Murat Abbos, Mete Sarialtun, Alper Aydin, Serdal Tashkin, Serkan O‘zturk, Mustafo Nihat Sutlash, Suleyman Atik, Ahmet Chichek, Yusuf Sutlash, Yusuf Ilbak, Servet Go‘kchay, Servet Go‘kcheyni hibsga olishga qaror qildi.
Sudya, gumondorlar Ahmet Palazog‘li, Alihan Aydin, Erjan Saatchi, Alperen Aydin, Bayram Tashkın, Sanan Munuklu, Jemal Ufuk Karakaya, Birsen Shahin va Vahit Do‘g‘anning "chet elga chiqishni taqiqlash" va "imzo shaklida sud nazorati chorasi" qo‘yib, ozod qilinishiga qaror qildi.
“Bu qaror bizning sud tizimimiz uchun sharmandalikdir”, degan Anqara meri, Imomo‘g‘lining partiyadoshi Mansur Yavash vaziyatga munosabat bildirib.
Hozircha voqeaning boshqa tafsilotlari ochiqlanmagan.
“Forbes Türkiye”ning yozishicha, agar shahar hokimi umumiy jinoyati uchun hibsga olinsa va uning lavozimidan chetlashtirish to‘g‘risida Ichki ishlar vazirligi qarori qabul qilinsa, uning o‘rniga shahar Kengashidan boshqa shaxs tayinlanadi. Biroq terrorizm jinoyati holatlarida tashqi ishonchli shaxslar tayinlanishi mumkin.
Ekrem Imomo‘g‘lining hibsga olinishi
19 mart kuni tongda Istanbul hokimi va Turkiya Prezidenti Rajab Toyib Erdo‘g‘anning asosiy siyosiy raqibi Ekrem Imomo‘g‘li hamda uning 106 tarafdori hibsga olingandi. Ular Kurd harbiy-siyosiy tashkiloti PKKga ko‘maklashish hamda boshqa noqonuniy harakatlarda ayblanmoqda.
Mazkur voqealar yuzasidan Turkiya Adliya vaziri Yilmaz Tunch tegishli bayonotini e’lon qildi. Uning ma’lum qilishicha, Istanbul Bosh prokuraturasi tomonidan olib borilayotgan tergov harakatlari doirasida 106 nafar gumonlanuvchiga, jumladan, Istanbul shahar hokimiga nisbatan bugun ertalab hibsga olish to‘g‘risida qarorlar chiqarilgan. Bildirilishicha, Istanbul Bosh prokuraturasi tomonidan 2 ta tergov harakatlari olib borilmoqda. Shuningdek, Istanbul Bosh prokuraturasining bayonotidan ma’lum bo‘lishicha, tergov materiallari orasida MASAK (Moliyaviy jinoyatlarni tergov qilish boshqarmasi) hisobotlari, soliq ekspertizasi xulosalari, depozitlar haqida hisobotlar, guvohlarning bayonotlari va boshqa dalillar mavjud.
Turkiya Prezidenti devoni Kommunikatsiyalar boshqarmasi rahbari Faxriddin Altun esa Ekrem Imomo‘g‘li hibsga olingani ortidan davlat rahbariga nisbatan tuhmat va bo‘htonlar aytilayotganini bildirdi. U sud organlarining mustaqilligiga putur yetkazish, shuningdek, Prezident Rajab Toyib Erdo‘g‘anga daxl qilish, mafkuraviy tuhmat harakatlariga qarshi ekanini ma’lum qilgan.
Istanbul shahri talabalari Imomo‘g‘lining hibsga olinishiga qarshi namoyishga chiqdi. Turkiyaning asosiy muxolifatdagi Jumhuriyat xalq partiyasi (JXP) yetakchisi O‘zg‘ur O‘zel 86 millionlik respublika aholisini kelasi yakshanba, 23 mart kuni Istanbul hokimi Ekrem Imomo‘g‘lining hibsga olinishiga qarshi ko‘chalarga chiqishga chaqirdi. JXP a’zolari o‘zlarining partiyadoshlarining hibsga olinishiga norozilik sifatida minbarga to‘planib, parlament Bosh assambleyasi ishini to‘sib qo‘yishdi.
