Туркияда кенг кўламли норозилик намойишлари бошланди (видео)

Истанбул шаҳри талабалари шаҳарнинг мухолиф ҳокими ва мамлакат Президенти Ражаб Тойиб Эрдўғаннинг асосий сиёсий рақиби Экрем Имомўғлининг ҳибсга олинишига қарши намойишга чиқди. Бу ҳақда “Urfa Haber” хабар берди.

Маҳаллий нашрларга кўра, Истанбул университети талабаларининг норозилик чиқишлари чоғида полиция намойишчиларга куч ишлатган.

Маҳаллий журналист Кайҳан Айҳаннинг таъкидлашича, Экрем Имомўғлига қўллаб-қувватлов билдирган талабалар Истанбул университетида полиция баррикадаларини ёриб ўтиб, Боязид майдонига чиққан. Шунингдек, юзлаб шаҳар ҳокимияти ходимлари ҳам ҳокимият биноси олдида йиғилган.

“Экрем Имомўғли сақланаётган Ватан полиция бўлимига олиб борувчи йўллар тўсиб қўйилган. Одамлар баррикадалар олдида тўпланмоқда. Истанбул университети талабалари Экрем Имомўғлига қўллаб-қувватлов билдириш учун йиғилди. Улар полиция баррикадаларини ёриб ўтиб, Боязид майдонига чиқди”, деб ёзади журналист Х саҳифасида.

Экрем Имомўғли ҳибсга олинганидан кейин илк бор ижтимоий тармоқларда баёнот эълон қилди. У “қатъий экани” ва “шаҳар аҳолиси ҳамда бутун Туркияга ишонишини” билдирган. Полиция хабарига кўра, Имомўғли камида тўрт кун давомида қамоқда қолади.

Маълумот учун, 18 март куни Истанбул университети Имомўғлининг дипломини бекор қилганини эълон қилди. Диплом беришда йўл қўйилган хатолик туфайли қабул қилинган бу қарор Туркия қонунчилигига кўра, Имомўғлини президентликка номзодини қўйиш ҳуқуқидан маҳрум қилади. Сабаб сифатида 1990 йилда Имомўғлининг Шимолий Кипр университетидан Истанбул университетига ноқонуний равишда ўтказилгани кўрсатилган.

Туркия қонунчилигига кўра, президентликка номзод бўлиш учун олий маълумот талаб этилади, шу сабабли ушбу қарор Имомўғлининг сайловда қатнашиш ҳуқуқини бекор қилади. У билан бирга яна 27 кишининг дипломлари ҳам ҳақиқий эмас деб топилган.

Туркиянинг асосий мухолифат партияси – “Жумҳурият Халқ” партияси ушбу қарорга парламент даражасида норозилик билдирган. Бунга жавобан Истанбул университети Туркия Олий таълим кенгаши (YÖK) Имомўғлининг дипломини сохталаштирилган деб топгани ва шу асосда бекор қилинганини эълон қилган. Ушбу масала юзасидан барча ҳужжатлар Истанбул прокуратураси ва YÖK'га қўшимча тергов учун топширилади.

Эслатиб ўтамиз, Истанбул ҳокими Экрем Имомўғли ва унинг матбуот билан алоқалар бўйича маслаҳатчиси Мурат Онгун бугун махсус операция давомида қўлга олиниб, судга олиб борилган. Иш бўйича жами 100 нафар шахс гумонланувчи сифатида тергов қилинмоқда.

Шундан сўнг, мамлакатда ижтимоий тармоқларга кириш чекланган. Бундан ташқари, ҳокимнинг ҳибсга олиниши ортидан Истанбулда 23 мартгача барча турдаги йиғилиш, намойиш ва митинглар тақиқланган.

CNN Turk телеканали  ҳокимнинг ҳибсга олиниши сабабини маълум қилди. Унга кўра, Истанбулнинг мухолиф ҳокими Экрем Имомўғли коррупция, порахўрлик ва товламачилик билан шуғулланган ташкилотга алоқадорликда айбланиб ҳибсга олинган. Унинг уйида тинтув ўтказилган ва у полиция кузатуви остида суд биносига олиб кетилган.