Эрдўғаннинг асосий рақиби махсус операцияда ҳибсга олинди (видео)

Туркиянинг Истанбул шаҳри ҳокими ва мамлакат Президенти Ражаб Тойиб Эрдўғаннинг асосий сиёсий рақиби Экрем Имомўғли ва унинг матбуот бўйича маслаҳатчиси Мурат Онгун махсус операция давомида ҳибсга олиниб, судга олиб кетилди. Иш доирасида жами 100 нафар шахс гумонланувчи сифатида тергов қилинмоқда. Бу ҳақда CNN Turk хабар берди.

Бунгача “Sabah” Истанбул ҳуқуқ-тартибот органлари кенг қамровли операция бошлаганини ва мухолифат ҳоким Экрем Имомўғлини ҳибсга олиш тўғрисида ордер берганини хабар қилганди.

“Истанбулда кенг қамровли коррупцияга қарши операция бошланди. Ушбу операция доирасида шаҳар ҳокими Экрем Имомўғли ва унинг матбуот бўйича маслаҳатчиси Мурат Онгунни ҳибсга олиш учун ордер берилди”, дейилади хабарда.

CNN Turk телеканали  ҳокимнинг ҳибсга олиниши сабабини маълум қилди.

“Истанбулнинг мухолиф ҳокими Экрем Имомўғли коррупция, порахўрлик ва товламачилик билан шуғулланган ташкилотга алоқадорликда айбланиб ҳибсга олинди. Унинг уйида тинтув ўтказилди ва у полиция кузатуви остида суд биносига олиб кетилди”, дейилади телеканал хабарида.

Шунингдек, прокуратура коррупция, порахўрлик, фирибгарлик ва пора бериш жиноятларида гумон қилинаётган 100 нафар шахсни ҳибсга олиш, тинтув ўтказиш ва уларни қўлга олиш бўйича буйруқ берганини билдирди.

Шунингдек, шу ҳафта Истанбул университети Имомўғли дипломининг ноқонуний эканини аниқлаб, уни бекор қилган. Шаҳар прокуратураси эса илгарироқ унинг дипломининг ҳақиқийлигини текширишни талаб қилган.

Истанбул ҳокими мухолифат “Жумҳурият Халқ” партияси томонидан ўтказилган ички сайловларда президентлик сайловларига ягона номзод сифатида танланган эди. Уни келгуси президентлик сайловларида ҳукмрон партия номзодининг асосий рақиби сифатида кўришмоқда.

Экрем Имомўғли 2024 йил апрель ойида Истанбул ҳокими этиб қайта сайланган. У бундан аввал беш йил давомида ҳам шаҳарни бошқарган.

Маълумот учун, 2022 йилда Имамўғли Туркия Олий сайлов кенгаши вакилларини ҳақорат қилганликда айбланиб, қамоқ жазосига ҳукм қилинган эди.

Эслатиб ўтамиз, аввалроқ “Жумҳурият Халқ” партияси аъзоси Экрем Имомўғли Анқарада сўзлаган нутқида Туркия раҳбари Ражаб Тойиб Эрдўғаннинг даври тугаганини айтган эди. Шунингдек, у Эрдўған сиёсати фақатгина ёмонлик келтирганини, давлатда бошқарув сарой  тизимига ўтиб кетганини, Туркияга сарой эмас, аксинча, парламент кераклигини таъкидлаган.