Rossiya hududiga zarba berishga ruxsat berish NATOning mojaroga bevosita aralashuviga tengdir – Putin 

Kecha, 12 sentyabr kuni Birlashgan madaniyatlar forumining yalpi majlisidagi nutqi yakunida Rossiya Prezidenti Vladimir Putin OAV vakillarining Rossiya Federatsiyasi hududiga G‘arb qurollari bilan uzoq masofali zarbalar berish bo‘yicha ehtimoliy qarorga oid savollariga javob berdi.

“Ukrainaning G‘arbning yuqori aniqlikdagi qurollari bilan Rossiya hududiga zarbalari NATO davlatlarining urushda bevosita ishtirok etishini anglatadi", deydi u.

Uning so‘zlariga ko‘ra, Ukraina Qurolli kuchlarining o‘zi bunday zarbalarni amalga oshirishga qodir emas – bu faqat NATO sun’iy yo‘ldoshlarining Ukrainada mavjud bo‘lmagan ma’lumotlaridan foydalangan holda sodir bo‘lishi mumkin va faqat alyans harbiy xizmatchilari ushbu raketa tizimlariga parvoz missiyalarini amalga oshirishlari mumkin.

"Gap NATO davlatlari harbiy mojaroga bevosita aloqador yoki yo‘qligi haqida qaror qabul qilish haqida ketmoqda", deydi Putin.

Putinning so‘zlariga ko‘ra, agar qaror qabul qilinsa, bu mojaroning mohiyatini o‘zgartiradi va bu NATO davlatlari Rossiya bilan urush holatida ekanligini bildiradi.

“Agar shunday bo‘lsa, bu mojaroning mohiyati o‘zgarganini hisobga olib, biz uchun yaratilishi mumkin bo‘lgan tahdidlardan kelib chiqib, tegishli qarorlar qabul qilamiz”, deydi Putin.

Eslatib o‘tamiz, Buyuk Britaniya Ukrainaga Rossiya hududiga Storm Shadow raketalari bilan zarba berishga ruxsat bergandi. Avgust oyi oxirida Ukraina Mudofaa vaziri Rustam Umarov AQSHga tashrifi chog‘ida Amerika tomoniga Rossiya hududidagi nishonlar ro‘yxatini ularga zarba berish uchun topshirdi.