Medvedev Ukrainada urush qachon tugashini aytdi

Rossiya Qurolli Kuchlarining Ukrainaga qarshi hujumi doirasida belgilangan rejalar to‘liq hajmda amalga oshiriladi va G‘arbning Rossiyaga qarshi sanksiyalari bu vaziyatda hech narsani o‘zgartirmaydi. Bu haqda Rossiya Federatsiyasi Xavfsizlik kengashi raisi o‘rinbosari Dmitriy Medvedev o‘zining “VKontakte” ijtimoiy tarmog‘idagi sahifasida ma’lum qildi. 

Medvedevga ko‘ra, avvalroq G‘arb davlatlari Rossiya Xavfsizlik kengashi azolariga qarshi sanksiyalar joriy etgan. 

“Bu ajoyib taqiqlar, albatta, hech narsani o‘zgartirmaydi. Bu hatto Davlat departamentidagi nodon odamlarga ham tushunarli. Jumladan, Donbassni himoya qilish uchun harbiy operatsiya o‘tkazish to‘g‘risidagi qaror. Bu Rossiya Prezidenti aytgan barcha natijalarga erishilgunga qadar to‘liq hajmda amalga oshiriladi. Ko‘p ham, kam ham emas. Aytgancha, 2008 yilda ham xuddi shunday vaziyat bo‘lgan edi”, deb yozadi u o‘z xabarida. 

Medvedev shuningdek, G‘arb sanksiyalari bu holatda afsona, uydirma va gap bo‘lib qolgani barcha fikrlaydigan odamlarga ayon ekanini ta’kidlab, ular unga befarq ekanini qo‘shimcha qilgan.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Buning ortidan Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirdi. Ko‘p o‘tmay Prezident Rossiya bilan diplomatik aloqani uzdi.

Rus qo‘shinlari dastlab Kiyev va Xarkovga raketa hujumi uyushtirdi. Prezident Zelenskiy mamlakatda harbiy holat e’lon qildi. Shuningdek, rasmiy idora rus qo‘shinlari Xarkov va Odessa viloyatiga kirib borganini bildirdi.

Hujum boshlanganidan ko‘p o‘tmay, LXR Ichki ishlar vaziri maslahatchisi Vitaliy Kiselev Schaste va Stanitsa shaharchalari LXR nazoratiga o‘tganini e’lon qildi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.