Qamoqdagi sobiq bosh vazir Nobel mukofotiga nomzod bo‘ldi

Pokistonning qamoqdagi sobiq bosh vaziri Imron Xon boshqaruvi, inson huquqlari va demokratiya yo‘lidagi sa’y-harakatlari uchun Tinchlik bo‘yicha Nobel mukofotiga nomzod qilib ko‘rsatildi. Bu haqda kecha, 29 mart kuni kuni Norvegiyaning “Partiet Sentrum” siyosiy partiyasiga tegishli Pokiston Jahon Alyansi advokatlik guruhi a’zolari e’lon qildi.

“Biz “Partiet Sentrum” nomidan nomzodlik huquqiga ega bo‘lgan shaxs bilan ittifoqda Pokistonning sobiq bosh vaziri janob Imron Xonni Pokistonda inson huquqlari va demokratiya sohasidagi faoliyati uchun Tinchlik bo‘yicha Nobel mukofotiga nomzod qilib ko‘rsatganini e’lon qilishdan mamnunmiz”, deyiladi partiyaning X'dagi sahifasida.

Qayd etish joiz, Xon 2019 yilda ham Janubiy Osiyoda tinchlikni mustahkamlashga qaratilgan sa’y-harakatlari uchun Tinchlik bo‘yicha Nobel mukofotiga nomzod bo‘lgan.

north_east

Imron Xon va kelinoyi yana bir jazoga hukm qilindi

Har yili Norvegiya Nobel qo‘mitasi yuzlab nomzodlarni qabul qiladi, shundan so‘ng ular sakkiz oylik uzoq jarayon orqali g‘olibni tanlaydi.

Ma’lumot uchun, Xon Pokistonning asosiy muxolif “Adolat harakati” partiyasi partiyasi asoschisi bo‘lib, u 2023 yil avgustidan beri qamoqda. Shu yil yanvar oyida u hokimiyatni suiiste’mol qilish va korrupsiya bilan bog‘liq ish bo‘yicha 14 yillik qamoq jazosiga hukm qilingan edi. Bu sobiq bosh vazir sudlangan to‘rtinchi yirik ish edi. Davlat sovg‘alarini sotish, davlat sirlarini oshkor qilish va noqonuniy nikoh bilan bog‘liq ilgari chiqarilgan uchta sudlanganlik sud tomonidan bekor qilingan yoki to‘xtatilgan.

Xon 2022 yil aprelida o‘tkazilgan ishonchsizlik votumi ortidan hokimiyatni yo‘qotgan. U o‘ziga qo‘yilgan barcha ayblovlarni inkor etib, ularni siyosiy motivli deb ataydi.