Қамоқдаги собиқ бош вазир Нобель мукофотига номзод бўлди

Покистоннинг қамоқдаги собиқ бош вазири Имрон Хон бошқаруви, инсон ҳуқуқлари ва демократия йўлидаги саъй-ҳаракатлари учун Тинчлик бўйича Нобель мукофотига номзод қилиб кўрсатилди. Бу ҳақда кеча, 29 март куни куни Норвегиянинг “Partiet Sentrum” сиёсий партиясига тегишли Покистон Жаҳон Альянси адвокатлик гуруҳи аъзолари эълон қилди.

“Биз “Partiet Sentrum” номидан номзодлик ҳуқуқига эга бўлган шахс билан иттифоқда Покистоннинг собиқ бош вазири жаноб Имрон Хонни Покистонда инсон ҳуқуқлари ва демократия соҳасидаги фаолияти учун Тинчлик бўйича Нобель мукофотига номзод қилиб кўрсатганини эълон қилишдан мамнунмиз”, дейилади партиянинг X'даги саҳифасида.

Қайд этиш жоиз, Хон 2019 йилда ҳам Жанубий Осиёда тинчликни мустаҳкамлашга қаратилган саъй-ҳаракатлари учун Тинчлик бўйича Нобель мукофотига номзод бўлган.

north_east

Имрон Хон ва келинойи яна бир жазога ҳукм қилинди

Ҳар йили Норвегия Нобель қўмитаси юзлаб номзодларни қабул қилади, шундан сўнг улар саккиз ойлик узоқ жараён орқали ғолибни танлайди.

Маълумот учун, Хон Покистоннинг асосий мухолиф “Адолат ҳаракати” партияси партияси асосчиси бўлиб, у 2023 йил августидан бери қамоқда. Шу йил январь ойида у ҳокимиятни суиистеъмол қилиш ва коррупция билан боғлиқ иш бўйича 14 йиллик қамоқ жазосига ҳукм қилинган эди. Бу собиқ бош вазир судланган тўртинчи йирик иш эди. Давлат совғаларини сотиш, давлат сирларини ошкор қилиш ва ноқонуний никоҳ билан боғлиқ илгари чиқарилган учта судланганлик суд томонидан бекор қилинган ёки тўхтатилган.

Хон 2022 йил апрелида ўтказилган ишончсизлик вотуми ортидан ҳокимиятни йўқотган. У ўзига қўйилган барча айбловларни инкор этиб, уларни сиёсий мотивли деб атайди.