Facebook Rossiya OAViga taqiq qo‘ydi 

Facebook ijtimoiy tarmog‘i rahbariyati Rossiya davlat ommaviy axborot vositalariga dunyo bo‘ylab reklama ko‘rsatish va monetizatsiya qilishni taqiqladi. Bu haqda uning xavfsizlik siyosati bo‘limi rahbari Nataniel Gleyxer ma’lum qildi.

“Biz Rossiya davlat OAVlariga butun dunyo bo‘ylab platformamizda reklama joylashtirishni va monetizatsiya qilishni taqiqlaymiz. Ushbu o‘zgarishlar allaqachon kuchga kirdi va dam olish kunlari davom etadi”, degan Gleyxer. 

Uning ta’kidlashicha, ijtimoiy tarmoq mutaxassislari Rossiya Federatsiyasi davlat ommaviy axborot vositalarining nashrlarini tegishli eslatmalar bilan kuzatib borishda davom etadi. 

Facebook bundan oldin Rossiyaning to‘rtta OAV: “Zvezda” telekanali, “RIA Novosti” axborot agentligi, “Lenta.ru” va “Gazeta.ru” internet platformalarining rasmiy akkauntlariga cheklov kiritgan.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Buning ortidan Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirdi. Ko‘p o‘tmay Prezident Rossiya bilan diplomatik aloqani uzdi.

Rus qo‘shinlari dastlab Kiyev va Xarkovga raketa hujumi uyushtirdi. Prezident Zelenskiy mamlakatda harbiy holat e’lon qildi. Shuningdek, rasmiy idora rus qo‘shinlari Xarkov va Odessa viloyatiga kirib borganini bildirdi.

Hujum boshlanganidan ko‘p o‘tmay, LXR Ichki ishlar vaziri maslahatchisi Vitaliy Kiselev Schaste va Stanitsa shaharchalari LXR nazoratiga o‘tganini e’lon qildi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.