AQSH O‘zbekistonga qarshi o‘yin uchun kengaytirilgan tarkibini e’lon qildi

Avval xabar berilganidek, FIFA kunlari doirasida O‘zbekiston milliy terma jamoasi Amerika Qo‘shma Shtatlari va Meksika bilan o‘rtoqlik o‘yinida maydonga tushadi. Joriy yilning 10 sentyabrida Toshkent vaqti bilan 03:30 da start oladigan mazkur uchrashuv Missuri shtati Sent-Luis shahridagi “City Park” stadionida bo‘lib o‘tadi.

AQSH milliy jamoasi ushbu bahsda O‘zbekiston vakillariga qarshi o‘ynaydigan futbolchilarining kengaytirilgan tarkibini e’lon qildi. Qaydnomaga Kristian Pulishich (Milan), Ueston Makkenni (Yuventus), Serjino Dest (PSV) kabi tajribali futbolchilar chaqirilgan.

Eslatib o‘tamiz, avvalroq AQSH va O‘zbekiston o‘rtasidagi bahsni gonduraslik Nelson Salgado boshqarib borishi haqida xabar berilgan edi. Shuningdek, Srechko Katanets qo‘l ostidagi O‘zbekiston milliy terma jamoasi 13 sentyabr kuni tarkibida Gilermo Ochoa, Raul Ximenes, Ektor Errera va Edson Alvares kabi taniqli futbolchilari bo‘lgan Meksika termasi bilan ham o‘zaro bahs olib boradi.

Aytish joiz, O‘zbekiston milliy terma jamoasi oktyabr oyida Xitoy va Vetnamga qarshi o‘rtoqlik uchrashuvi o‘tkazadi.