Жонсон Путинни мақсадига етиштирмаслик учун “ҳаракат режаси”ни тақдим этади 

Буюк Британия Бош вазири Борис Жонсон келаси ҳафта Лондонда Канада, Нидерландия ва Марказий Европа етакчилари билан учрашади ва халқаро ҳамжамият учун олти банддан иборат “ҳаракат режаси”ни баён этади. Бу ҳақда Даунинг-стрит хабарида айтилади.  

Хусусан, эртага, 7 март куни куни Буюк Британия Бош вазири Даунинг-стритда Канада ва Нидерландиядан келган ҳамкасблари билан учрашади, 8 март куни эса “Вишеград гуруҳи” мамлакатлари – Чехия, Венгрия, Польша ва Словакия раҳбарларини қабул қилади. 

“Бош вазир етакчиларга Путиннинг амбицияларини рўёбга чиқаришига йўл қўймаслик учун халқаро ҳамжамият олти банддан иборат ҳаракатлар режасига мувофиқ бирлашиши кераклигини айтади”, дейилади хабарда. 

Режа Украина учун халқаро гуманитар коалицияни сафарбар қилиш, Украинани ўзини ўзи мудофаа қилиш бўйича саъй-ҳаракатларини қўллаб-қувватлаш, Россия ҳукуматига иқтисодий босимни кучайтириш, “Россия Украинада қилаётган ишларининг кескин нормаллашишига” йўл қўймаслик, деэскалацияни юмшатиш учун дипломатик йўллардан фойдаланиш ва тезлик билан бутун Евро-Атлантика ҳудудида хавфсизлик ва барқарорликни ошириш кампаниясини бошлашни ўз ичига олади.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.