“Уларни тўхтатинг”. Зеленский россияликларга ўлмасдан ақл-ҳушини йиғиб олишни таклиф қилди
Олам
−
26 Февраль 2022
17037Украина Президенти Владимир Зеленский Россияни урушни тўхтатишга чақирди. Бу ҳақда у навбатдаги видеомурожаатида сўз очган.
"Россияда мени эшитишларини хоҳлайман. Минглаб яраланганлар, юзлаб маҳбуслар нима учун Украинага жўнатилганини тушуна олмай, бошқаларни ўлдиришади, ўлишади. Ҳукуматингизга урушни зудлик билан тўхтатиш кераклигини қанчалик тезроқ айтсангиз, кўпларингиз тирик қоласиз.
Фуқароларингиз томонидан урушга қарши эътирозлар бўлаётганини кўриб турибмиз. Биз биламизки, Россияда кўпчилик ҳозир ҳокимиятнинг шафқатсизлигидан ҳайратда. Бу жуда тўғри муносабат. Ушбу реакция учун раҳмат”, дейди Зеленский.
Шунингдек, Президент, Украинани қўллаб-қувватлаган Леонид Парфёнов, Дмитрий Муратов, Юрий Дудь, Лии Ахеджакова, Валерий Меладзе ва виждони тоза минглаб бошқа муносиб русларга миннатдорлик билдирган.
“Фақат ёлғон гапирадиганларни, сизга, бизга, бутун дунёга ёлғон сўзлаётганларни тўхтатинг. Биз бу урушни тугатишимиз керак. Биз тинч дунёда, инсонийлик дунёсида яшай оламиз”, дейди Зеленский.
Эслатиб ўтамиз, бугун, 26 февраль куни эрталаб ижтимоий тармоқларда уни бункерга яшириниб, олгани ҳақида хабарлар тарқалаётганига муносабат билдириб, Киевда эканлигини ва яширинмаганини маълум қилганди.
Россиянинг Украинага босқини
Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.
Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.
24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.
Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.
Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.
Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.
Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.
25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.
LiveБарчаси