Украинадаги “махсус операция” тез орада якунланади – Климов

Россиянинг Украинадаги махсус операцияси тез орада якунланади. Москва махсус операцияни чўзмоқчи эмас. Бу ҳақда бугун, 15 апрель куни Федерация Кенгашининг Халқаро алоқалар бўйича қўмитаси раисининг ўринбосари Андрей Климов Африка ва Осиё оммавий ахборот воситалари вакиллари билан бўлиб ўтган брифинг чоғида маълум қилди.

“Россия Федерациясининг махсус ҳарбий операцияси яқинда тугайди, биз уни атайлаб чўзмоқчи эмасмиз”, дейди Климов.

Унинг сўзларига кўра, ҳарбий босқич Украина Россия ва бутун дунё учун хавфсиз бўлганидан кейин тўхтатилади.

“Биолабораториялар – у ерда нима бўлаётганини кўрамиз, ядровий объектлар хавфсизлигини таъминлаймиз. Шундан сўнг ҳарбий босқич тўхтайди”, дейди Климов бу яқин келажакда содир бўлишини қўшимча қилиб.

Сенаторнинг таъкидлашича, Ғарб давлатлари ёнаётган оловга бензин қуйиб, Украинага қурол етказиб беришда давом этмоқда.

Эслатиб ўтамиз, Россия Президенти Владимир Путин Туркия Президенти Ражаб Тойиб Эрдўған билан бўлган телефон орқали суҳбатида Киев урушни тўхтатса ва Россиянинг талабларини бажарсагина Москва Донбассни ҳимоя қилиш бўйича махсус операцияни тўхтатиши мумкинлигини айтган эди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.