Украина Россияни тўхтатиш учун Хитой “эшигига бош урди”
Жамият
−
02 Март 2022
46943Украина Ташқи ишлар вазири Дмитрий Кулеба Хитойни Россия билан сулҳ битимига эришишда воситачилик қилишга чақирди. Хитой ТИВ маълумотларига кўра, Кулеба Украина томонининг илтимосига биноан ўтказилган телефон мулоқоти чоғида Хитой дипломатияси раҳбари Ван Ига шундай мурожаат билан мурожаат қилган.
Украина вазири ўз ҳамкасбини Россия билан музокаралар бориши ҳақида маълумот берган. Кулебанинг таъкидлашича, жангларни тугатиш Украина учун устувор вазифадир.
Украина дипломатияси раҳбари Киевда улар можарони музокаралар йўли билан ҳал этиш тарафдори эканини, Россия билан мулоқотга тўлиқ очиқлик билан ёндашишини, вазиятнинг мураккаблигига қарамай, осойишталикни сақлашга ва мулоқотни ривожлантиришга ҳаракат қилишини таъкидлаган.
“Киев Хитой билан алоқаларни мустаҳкамлашга тайёр ва ўт очишни тўхтатиш учун Хитой воситачилигига ишонади”, дея қўшимча қилган Кулеба.
Ўз навбатида, Ван И Пекин Украина тинч аҳолисига етказилган зарардан хавотирда эканини билдирган.
Ван И Хитой томонларни келишмовчиликларни музокаралар йўли билан ҳал қилишга чақирган ва сиёсий ечимга эришиш учун барча халқаро саъй-ҳаракатларни қўллаб-қувватлашини билдирган. Аммо Пекин бу борада ёрдам беришини айтмаган.
Россиянинг Украинага босқини
Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.
Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.
24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.
Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.
25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.
Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.
Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.
Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.
Европа давлатлари, АҚШ ва Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.
LiveБарчаси