Трампнинг Канада, Мексика ва Хитойга божлари кучга кирди
Олам
−
04 Март 2179
АҚШнинг Мексика, Канада ва Хитойга божлари бугун, 4 март куни ярим тундан кейин кучга кирди. Бу ҳақда Оқ уй маълум қилди.
Мексика ва Канада товарларига тарифлар 25% ни ташкил қилади. Хитой товарлари учун божлар 10 фоиздан 20 фоизга оширилди.
Февраль ойи бошида АҚШ Президенти Мексика, Канада ва Хитойдан келадиган товарларга тарифлар жорий этиш ҳақидаги фармонни имзолади.
Мексика ва Канада етакчилари америкаликлар билан музокаралардан сўнг бир қанча ён босиш орқали кечикиш бўйича келишиб олганди. Оттава, хусусан, АҚШ билан чегарани мустаҳкамлаш учун 1,3 миллиард долларлик режани амалга оширишга ва наркотик моддалар савдосига қарши курашиш бўйича янги мажбуриятларни олишга ваъда берди.
Мексика расмийлари, ўз навбатида, ноқонуний миграция ва гиёҳванд моддалар савдосига қарши курашни кучайтириш учун АҚШ билан чегарада 10 минг мексикалик аскарни жойлаштиришга рози бўлди.
Хитой Савдо вазирлиги эса товарларга қўйилган юқори божлар туфайли АҚШдан ўч олиш режасини эълон қилди. Вазирлик АҚШнинг ҳаракатларидан “қатъий норозилик” билдирди. Вазирлик АҚШнинг хатти-ҳаракатлари Жаҳон Савдо Ташкилоти қоидаларини бузишини ва кўп томонлама савдо тизимига таҳдид солаётганини қайд этди. Трамп Хитой товарларига тарифларни ошириш қарорини Хитой синтетик опиоидлар, жумладан, фентанил билан курашиш учун “адекват чоралар” кўрмагани билан изоҳлади.
Эслатиб ўтамиз, олдинроқ Хитой АҚШ Президенти Дональд Трампнинг бож тарифлари сиёсатига жавобан 10 мартдан бошлаб Америка қишлоқ хўжалиги маҳсулотларига қўшимча 10-15 фоиз бож жорий қилиши маълум қилинганди.
