Мексика ҳам АҚШ чегарасига қўшин юборади

Мексика ҳукумати шимолий чегарага қўшимча равишда 10 минг нафардан ортиқ Миллий гвардия аскарларини юборади. Ушбу чора наркотик савдосига қарши кураш доирасида амалга оширилмоқда. Бу ҳақда мамлакат Президенти Клаудия Шейнбаум АҚШ Президенти Дональд Трамп билан ўтказилган музокаралардан сўнг Х ижтимоий тармоғидаги саҳифасида маълум қилди.

“Мексика АҚШга, айниқса, фентанил контрабандасининг олдини олиш мақсадида шимолий чегарасини 10 минг Миллий гвардия ҳарбий хизматчилари билан зудлик билан мустаҳкамлайди”, деб ёзди Шейнбаум.

Унинг сўзларига кўра, Вашингтон ўз навбатида Мексикага ноқонуний қурол олиб кирилишининг олдини олиш бўйича чораларни кучайтиришга ваъда берган. Бугун, 3 февралдан бошлаб АҚШ ва Мексика ҳукумат делегациялари хавфсизлик ва савдо йўналишларида ҳамкорликни йўлга қўяди.

Шунингдек, Шейнбаум ва Трамп ўртасида ўтказилган музокаралар натижасида АҚШ томонидан Мексика маҳсулотларига нисбатан жорий этилган божхона тарифларининг амал қилиши бир ойга тўхтатилади.

Эслатиб ўтамиз, аввалроқ АҚШ 1 февралдан бошлаб Канада ва Мексикадан келган товарларга 25 фоиз, Хитойдан эса 10 фоизлик божлар жорий қилиши хабар қилинганди. Шунингдек,  Дональд Трамп инаугурация кунидаёқ иммиграция чораларини кучайтиришга олиб келадиган бир қатор фармонларни имзолади. Хусусан, у АҚШнинг жанубий чегарасида фавқулодда ҳолат эълон қилди. Бу чегара девори қурилишини якунлаш учун Пентагон ва мамлакат Қуролли кучларидан қўшимча ресурсларни йўналтиришни назарда тутади.